«Эллэйээдэ» научнай экспедиция каникуллар кэмнэригэр түөрт быыстапкаҕа кыттар

Ол курдук, Г.В. Ксенофонтов төрөөбүтэ 135 сылынан декада чэрчитинэн Покровскайга кыраайы үөрэтэр түмэлгэ ойууннааһыҥҥа, итэҕэлгэ о.д.а. ыытыллыбыт лекторий тэрээһинигэр кыттан түҥ былыргыны кэпсиир Эркээни хочотуттан булбут экспонаттарынан быыстапкаҕа кытынна. Манна туой оҥоһуктар тоороххойдоруттан саҕалаан көрдөрүүгэ куһаҕан тыыны хаайар түктэйэҕэ тиийэ туруорда (Түмэлгэ кэлэн көрүҥ).

Бу күннэргэ Алексей Дмитриев аатынан оскуола үөрэнээччилэрин эдэр чинчийээчилэрин булумньуларынан быыстапкалар Дьокуускайга Гуманитарнай чинчийии институтун (ИГИ СО РАН) Башарин аатынан түмэлигэр (былыргы саха сүгэлэрин), Покровскайга «Өлүөнэ очуостара» национальнай паарка визит-киинигэр Мааппа уонна туос маастара, Москваҕа 1957 сыллаахха улахан быыстапкаҕа кыттыбыт Елизавета Маркова үлэлэрэ көрдөрүүгэ тураллар. Сэтинньи бүтүөр аны «эллэйээдэлэр» Дьокуускайга Хомус түмэлигэр булумньуларын билиһиннэриэхтэрэ. Бу туһунан экспедиция научнай салайааччыта, энтузиаст, учуутал, кыраайы үөрэтээччи, педагог Прокопий Ноговицын иһитиннэрдэ.

Людмила Мордовская.