Аҕа — дьиэ кэргэн тутаах киһитэ. Кини барытыгар үтүө холобуру көрдөрөр буоллаҕына, оҕолоро ол суолтан туораабаттар. Эр киһи аҕа быһыытынан хайдах ситэрэ-хоторо, ыал ийэтиттэн быһаччы улахан тутулуктаах: хардарыта ытыктаһыы, өйөһүү-өйөнсүү — ыал бигэ буолар тутааҕа.

Үөрэх эйгэтигэр оҕону иитиигэ аҕа оруолун үрдэтэр уонна көҕүлүүр сыаллаах тэрээһин М.Е. Николаев аатынан Өктөмнөөҕү научнай-үөрэтэр кииҥҥэ буолла. Бу тэрээһин үөрэх кыһатын дириэктэрэ Юрий Шадрин быһаччы өйөбүлүнэн уонна олоххо көхтөөх киһи Алексей Андреев көҕүлээһининэн тэрилиннэ. Манна Покровскай куораттан мин, улуус Мунньаҕын дьокутаата, улуустааҕы ыччат парламенын бэрэссэдээтэлэ Виктор Константинов, Покровскай куорат 2-с №-дээх орто оскуола аҕаларын сүбэтин бэрэссэдээтэлэ Александр Рожин уонна «Сардаана» уһуйаан аҕаларын сүбэтин бэрэссэдээтэлэ Петр Дмитриев кытыннылар, санааларын үллэһиннилэр.

Өктөм нэһилиэгин эр дьоно тус олохторунан эрэ салайтаран олорор, үөрэх кыһатыгар соччо кыһаллыбат буоланнар, дьэ, эр дьон түмсэргэ санаммыттар. Инникитин былаан ылынан, үлэни далааһыннаахтык ыытарга, дьону түмэргэ быһаарыннылар. Түмүккэ биир санаанан М.Е. Николаев аатынан Өктөмнөөҕү научнай-үөрэтэр киин Аҕаларын сүбэтин бэрэссэдээтэлинэн Алексей Андреевы таллылар, күүс-көмө, өйөбүл буоларга бэлэмнэрин биллэрдилэр.

Уйбаан Уйгуурап,  Покровскай куорат Аҕа сүбэтин бэрэссэдээтэлэ.