Төхтүр нэһилиэгэр «Хаксык» ТХПК салайааччыта, СӨ тыатын хаһаайыстыбатын үтүөлээх үлэһитэ Тамара Осипова көҕүлээһининэн «Үлэнэн сайдар — тыам сирэ!» диэн ааттаах күүстээх үлэ күрэҕэ нэһилиэк тэрилтэлэрин икки ардыларыгар буолан ааста.
Уопсайа 6 хамаанда — Төхтүр орто оскуолата, «Киин Маркет» атыы-эргиэн киинэ, «Эркээни» култуура киинэ, Төхтүр нэһилиэгин олохтоох дьаһалтата, «Хаксык» ТХПК уонна нэһилиэкпит эдэр ыччаттарын хамаандата мустан үлэни өрө туттулар.
Хамаандалартан бириэмэҕэ икки кэрэ аҥар ынах ыата, сэппэрээтэр хомуйда, быа баайда, ньирэй аһатта. Кыттааччылар сүөһү көрүүтүгэр сыстаҕастарынан сөхтөрдүлэр, 5 мүнүүтэҕэ саамай элбэх үүтү Людмила Желобцова ыата. Бу көрүҥнэргэ Төхтүр орто оскуолата бастаата. Эр дьон рулоннаах оту төкүнүтэн аҕалан быатын сүөрэн бугуллаатылар, 50 киилэлээх бурдугу сүгэн киирэн уотурбаны оҥорон, саах баһан таһааран балбаахтаатылар. Хамаандаттан иккилии эр киһи бу кытаанах үлэни бэрт сылбырҕатык толордулар, ыксаан да ыллаллар, бэриллибит сорудахтары сүүс бырыһыан толордулар. Ол кэннэ күрэх кыттааччыларыгар анаан эмис эттээх, сибиэһэй сүөгэйдээх, итии чэйдээх сандалы тула санаа үллэстии буолла.
Тыҥааһыннаах киирсии түмүгэр үһүс миэстэ «Киин Маркет» кэлэктиибэ буолла, иккис — Төхтүр орто оскуолата уонна бастакы миэстэни эдэр ыччат хамаандата ылла. Кыттааччыларга бука барыларыгар эҕэрдэ суруктар, «Хаксык» ТХКП уонна «Эркээни» култуура киинин ааттарыттан бэлэхтэр туттарылыннылар. Бастаабыт хамаанда көһө сылдьар кубогынан наҕараадаланна.
Тамара Осипова эһиил дьаныардаах үлэ үөрүүтүн үллэстэрбит үтүө үгэскэ кубулуйуо диэн эрэннэрдэ. Бу курдук биир сааскы күн үтүө өйдөбүлэ буолан нэһилиэкпитигэр урукку кэми санатан фермаҕа үлэ күөстүү оргуйда, үрүҥ илгэ үрүлүйэ сүүрдэ, оҕо саас ахтылҕана барыбытын кууста.
Дайыына Захарова, Төхтүр с.