Биһиги Олоҥхо күнүн иннинэ биир дойдулаахпыт Георгий Устинович Гермогенов-Эргис туһунан билистибит. Фольклористика учуонайа В.В.Илларионов Георгий Устиновиһы этэр эбит: «Саха фольклористикатын аҕата».
Үлэлэрин ааҕан баран биһиги сөпкө этиллибит эбит диэн санааҕа кэллибит, сахалартан аан бастакынан Георгий Устинович олоҥхону научнайдык чинчийбит учуонай буолар. «Дьулуруйар Ньургун Боотур» олоҥхону тылын-өһүн үөрэтэн наардаан, сааһылаан, киирии ыстатыйалаан, тылдьыттаах кинигэ таһааттарбыт.
Бу кинигэни билигин даҕаны учуонайдар үрдүктүк сыаналыыллар, улахан научнай үлэ дииллэр. Ити үлэтинэн Георгий Устинович филологическай наука кандидата буолбута. Улахан научнай үлэтинэн буолар «Очерки по якутскому фольклору» диэн, кини бу кинигэҕэ норуот тылынан уус-уран айымньытын көрүҥнэрин наардаабыт, чинчийбит үлэлэрин киллэрбит, билигин аспираннар, студеннар ити кинигэнэн үөрэнэллэр. Учуонай быһыытынан уратыта диэн, Георгий Устинович үлэлэрин икки тылынан, ол аата нууччалыы уонна сахалыы суруйар.
Биир улахан үтүөтүнэн буолар Гаврил Васильевич архыыбын үйэтитиитэ. Дмитров куоракка кистэниллэ сытарын булан, сааһылаан аймахтарыгар Красноярскай куоракка уурдарбыт, кэлин Дьокуускай куорат Гуманитарнай чинчийии институт архыыбыгар аҕалан туттарбыт.
Ураты дьоҕурунан Георгий Устинович олоҥхоһуттары уруһуйдуур идэлээх эбит, биһиги көрөн сөхтүбүт, бары өттүнэн талааннаах диэн сыаналаатыбыт. Олоҥхону научнайдык чинчийбит биир дойдулаахпыт учуонай-фольклорист Г.У. Гермогеновы – Эргиһи үөрэтэн, ааҕан билиибитин эбиннибит.
Борисов Саша, Васильев Радомир, Покровскай бастакы нүөмэрдээх оскуола 7 кылааһын үөрэнээччилэрэ.