Биһиги Покровскай 1 №-дээх орто оскуолабытыгар директорбыт Спиридон Спиридонович араас омук доҕотторо өрүү ыалдьыттыыллар.
Ол курдук, кулун тутарга Сөрен Бирке диэн Германия биллэр музыкана, араас фестиваллар тэрийээччилэрэ кэргэнин Марайке Бадеры кытта ыалдьыттаан ааспыттара. Кини оҕолор иннилэригэр дудук диэн үрэр музыкальнай инструменынан оонньообута. Бу дьикти, ураты тэтимнээх музыка доҕуһуолунан оҕолор үҥкүүлэспиттэрэ. Ону таһынан уоһунан үрүллэр хормуосканан Техас муусукатын оонньоон сөхтөрбүтэ. Түмүгэр Спиридон Спиридоновичтыын иккиэн тэҥҥэ хомуска оонньообуттарын көрөөччүлэр олус сэҥээрбиттэрэ.
Үөрэнээччилэр бу көрсүһүүнү олус интэриэһиргээбиттэрэ, ыйытыылары биэрбиттэрэ. Ыалдьыппыт оҕолор Англия тылын үчүгэйдик билэллэриттэн сөхпүтэ. Михайлов Долун саха остуол оонньууларын хабылыгы уонна хаамысканы оонньотон көрдөрбүтэ.
Ити курдук биһиги киэн туттар кыракый хомус музыкальнай инструмеммыт норуоттары холбуур, ситимниир күүстээх. Ханнык да ыарахаттар доҕордоһууга мэһэй буолбаттар!
Хатылыков Сарыал, И.М. Яковлев аатынан Покровскай 1 №-дээх орто оскуолатын 7 “б” кылааһын үөрэнээччитэ, суруналыыһа