Бу ый саҕаланыытыгар Покровскайдааҕы кииннэммит бибилэтиэкэ иһинэн тэриллибит Людмила Колесова салайар «Өлүөнэ долгуннара» литературнай холбоһук чилиэннэрэ 7 буолан Хачыкаат нэһилиэгин модельнай бибилэтиэкэтин салайааччыта Светлана Архипова ыҥырыытынан (хата, өрүспүтүгэр суол аһыллан) кинигэ сүрэхтэниитигэр баран кэллибит. Олус үчүгэйдик көрүстүлэр. Хаһаайка бэйэтинэн мичээрдээбитинэн үөрэн-көтөн тоһуйда. Светлана Архипова үлэтин отчуотун иһиттибит. Ол курдук, Хачыкаакка 2000 сыллаахха «Куорсун» диэн литературнай түмсүү үлэтин кыраайы үөрэтээччи учуутал Гаврил Герасимов саҕалаабыт эбит. Онтон 2018 сыллаахтан ааттара уларыйан «Сыһыы кустуга» диэн буолбут. Бастакы хоһоон хомуурунньугунан кинигэтэ тахсарыгар Саха өрөспүүбүлүкэтин суруйааччылара Сэмэн Тумат, Айысхаана, Сайа, Наталья Харлампьева, Ойуку төһүү күүс буолбуттар. Олохтоох ааптардар Г.М. Герасимов, М.И. Исакова, А.П. Софронеева, М.Н. Ефимова, Л.Д. Киприянова, М.Р. Ермолаева, Н.С. Афанасьева, Күндүлү Чэмилээнэ, Харалаан кинигэлэрин сүрэхтэниилэрэ үрдүк таһымҥа тахсыбыттара. Төрөөбүт тылбытын сүтэрбэт, сайыннарар туһугар бары бииргэ түмсэн үлэлииллэрин хаартыскалар туоһулууллар. Кинигэни арыйаат даҕаны Людмила Федорова аҥардас «х» буукубаттан саҕалаан суруйбута-айбыта киһи санаатын көтөҕөр. Ханна харыйа өлгөмнүк үүнэр да, ол сиргэ олус талааннаах дьон үөскүүр диэни истибитим.
«Сыһыы кустуга» дириҥ ис хоһоонноох, истиҥник суруллубут хоһооннордоох, оҥоһуута да хаачыстыбалаах. Бу – айар талааннаах биир дойдулаахтарбыт хоһоонноро.Испииһэккэ 34 киһи баарыттан сорохторун эрэ билиэтиим. Владимир Аммосов Хаҥаластан хааннаах бэйэ киһитэ, айар куттаах, араас дьарыктаах. Кини Саха өрөспүүбүлүкэтээҕи спордун маастара, Россия худуоһунньуктарын сойууһун чилиэнэ, норуот маастара – дэгиттэр талаан киһитэ. Наталья Афанасьева элбэх саҥата да суох буоллар, нууччалыы-сахалыы субуруччу суруйар кыыс оҕото. Владимир Герасимов – дьэ, кырдьык, балыксыт бэрдэ, дэлэҕэ даҕаны Балыксыт диэн ааттаныа дуо. Иван Ефремов олоххо-дьаһахха улахан ситиһиилэрдээх. Зинаида Лазарева, убайым Г.М. Герасимов курдук, «Хаҥалас» хаһыат көхтөөх кэрэспэдьиэнэ, Николай Максимов эмиэ дэгиттэр талааннаах, уус бэрдэ, эмиэ да ырыаһыт, ситиһиилээх спортсмен. Иэйиитэ киирдэҕинэ хоһоону хото суруйар. Альбина Софронеева хоһоон хонуутугар хотолдьуйа хаампыта быданнаабыт, суруйааччы да буолуон сөптөөх киһи сылдьар. Ульяна Гурьева элбэх оҕолоох ийэ, улаханнык ытыктанар далбар-хотун. Данил Киприянов, хачыкааттар олус ытыктыыр тус-бас киһилэрэ этэ. Дэлэҕэ даҕаны холхуоһу салайан Ленин уордьаннаныа, ССРС Үрдүкү Сэбиэтин дьокутаата буолуо дуо?
Бэлиэтиэм этим саха тылын учууталын Раиса Заморщикова, кини миигин үчүгэйдик үөрэтэн олохтоох ааптар ааттаннаҕым буоллаҕа, махталым улахан. Тама-Буо-Харлампьевы, бииргэ төрөөбүт бырааппын, ахтан ааһыым — улуу хоһоонньут суруйааччы Христофор Горохов сэҥээрбит киһитэ. «Сыһыы кустуга» түмсүү саҥа кинигэлэммитинэн эҕэрдэ буоллун!
Харалаан.