«Хаҥалас» хаһыаппыт общественнай кэрэспэдьиэнэ, милиция бэтэрээнэ Анатолий Харлампьев кулун тутар 10 күнүгэр 80 сааһын туолар. Син балай да хаарын уулларан эрэр. Ол эрээри  бу сүүрэ-көтө сылдьар киһиэхэ киһи итиччэ сааһы биэрбэтэ биллэр.  Уус төрдүн Харалаан курдук Буотама тимирдээх тааһыттан  уһаарыллан тахсыбыт  курдук. Кэбис, быһа этимиэх. Дьолу-соргуну, эргиччи этэҥҥэ буолууну дьиэ кэргэнигэр баҕарыаҕыҥ! Онтон ордук   киһи  ытыктыыр киһитигэр тугу баҕарыай.

Анатолий Харлампьевы Хаҥаласка билбэт киһи да аҕыйах буолуо. Бочуоттаах сынньалаҥҥа тахсыар диэри, 1966 сыллаахтан 1994 сыллаахха диэри, улууспутугар ис дьыала салаатыгар үлэлээн кэлбитэ, «Эҥкилэ суох сулууспатын иһин«, «Покровскай куорат сайдыытыгар кылаатын иһин«мэтээллэрдээх, «ИДьМ бэтэрээнэ», «Россия ИДьМ 200 сыла» бэлиэлэрдээх, «Хаҥалас улууһун уус-уран оҥоһуктарын маастара», «Коммунистическай үлэ удаарынньыга»  ытыктанар ааттардаах.

Милицияҕа үлэни киһи эрэ барыта уйбат. Онно куһаҕаны көрөрүҥ үгүс,  майгыҥ-сигилиҥ да уларыйыан сөп. Ол иһин мин сөҕөбүн эрэ, хайдах бу киһи холкутун, өссө иэйиитэ киирэн хоһоон, кэпсээн  суруйарын, култуура киинигэр  кэргэнин кытары хуорга ыллыы барарын, араас тэрээһиннэргэ кэллиэгэлэрин Фридрих, Валерий  Федоровтары, Георгий Самсоновы кытары    бэлиэ түгэннэргэ кыраһыабай  формаларын кэтэн,наҕараадаларын иилинэн  ырыа ыллаан ньиргитэллэрин. Киинэ устуутугар кытары ылса  сылдьыбыта дии. Маһынан уһанан араас уустук оҥоһуктары оҥорор идэлээх. Бука, маннык ураты эйгэҕэ уоскулаҥ уйаланара дуу, эбэтэр 1944 сыллаахха сэрии буола турар кэмигэр  күн сирин көрбүт буолан кытаанах айылгылааҕа дуу.

Анатолий Петрович, сэрэйэбин эрэ, ыал аҕатын быһыытынан эрэллээҕин,  дьаһаллааҕын, аа-дьуо сылдьан   хаһаайын быһыытынан үлэтин  кэмигэр толорорун. Эргискэ даачатыгар сахалыы балаҕаннаах, хоту дойду дьонунуу ураһалаах, сүүрүүнэн үлүһүйэн күрэхтэһиилэргэ кыттар.Бэйэбит дьоһун итэҕэллээх, киэн туттар тыллаах  омук буолабыт диэн санаатын хаһыаппытыгар хаста да суруйда даҕаны биһиги, хаҥаластар, тириибит халыҥ, эбиллибиппит көстүбэт курдук…

Дьонун-сэргэтин, төрөөбүт Буотаматын туһунан Анатолий хас даҕаны кинигэни бэлэмнээн таһаарбыта биллэр. Сатаабата диэн арай массыына ыыппата дуу, ылсарга да санаммата дуу, общественнай тырааныспар  үлэһитэ,  Хаҥалас  «Авто-леди» массыына ыытааччы дьахталларын салайааччыта сытыы-хотуу Альбина Васильевна диэн бойобуой кэргэннээх буолан эбитэ дуу …  Дьиҥинэн, саха сатаабатаҕа суох  — Харалаан Уус сиэнэ буоллаҕа. Онтон Альбинатын кытары 56 сыл олох олорон кэллэ, үс оҕону атахтарыгар туруорбут сиэннэрдээх, хос сиэннэрдээх Покровскай сис ыала буолалларын билэбит. Таарыччы эттэххэ, улахан кыыстара Сардаана кэргэнинээн  Дьокуускайга олорор, «Роскадастр» ППК салаатын юриһа, Ирина  уонна Дарина диэн улааппыт кыргыттардаах, Альберт диэн сиэннээх. Харлампьевтар уоллара Эдуард суоппарынан үлэлиир, кэргэнинээн Юлечка диэн кыыстаахтар. Покровскайга өссө биир уоллара, Андрей, туспа   үс уоллаах, биир кыыстаах  улахан  ыал аҕата, «ПКС»  МУТ УК дириэктэрин солбуйааччы. Онон ычааттара бары үлэ үөһүгэр сылдьаллар. Этэҥҥэлэр, төрөппүттэригэр өйөбүл, тирэх буолалларын көрөбүн. Иитиллибит эрэ оҕо барыта кинилэргэ курдук араас сирдэргэ сынньана барарга путевка бэлэхтээн үөрдүбэт. Онон олохторо нус-хас. Покровскайга,  Дьокуускайга ыытыллар араас тэрээһиннэргэ аралдьыйа таарыйа сылдьалларын өрүү көрө үөрэбин. Анатолий Петровиһы бэлиэ күнүнэн  эҕэрдэлээн туран этэҥҥэ буолуҥ,  дьоһун дьоммут диэн баҕа санаабытын тириэрдэбит.

Людмила Аммосова.