1990-с сылларга, Сойуус ыһыллыбытын кэннэ, Өктөм сопхуос Төхтүр отделенията ыанньык ферматын кытта субан сүөһү фермаларын илдьэ хаалбыта. Нэһилиэк хас биирдии олохтооҕо бары паайдаах да буоллаллар, биир санаанан саҥалыы СПК ,,Хаксык» диэн саҥа хаһаайыстыба тэриллиитин уопсай мунньаҕынан өйөөбүттэрэ. Бу тэрилтэ күн бүгүнүгэр дылы ньиргиччи үлэлии олорор.
Төһө да ыарахан кэмнэр аасталлар, хаһаайыстыба ыһыллыбакка туруулаһан үлэлээн кэллэ. Бу күннэргэ Тамара Осипова салайааччылаах ,,Хаксык» ТХПК бэйэтин бэтэрээннэрин, араас кэмҥэ үлэлээн ааспыт үлэһиттэрин, испэсэлиистэрин ыраахтан-чугастан ыҥыран Покровскай куорат саҥалыы оҥоһуулаах «Эркээни” рестораныгар баай-талым астаах остуоллаах үбүлүөйдээх дьоро киэһэҕэ ыалдьыттатта.
30 сыллаах үбүлүөйдээх тэрээһиҥҥэ ыҥырыллан кэлбит ыалдьыттар, улуустааҕы тыа хаһаайыстыбатын салалтатын үлэһиттэрэ кэлэннэр үөрүүбүтүн үллэстэн эҕэрдэлээтилэр, санааларын атастастылар. Бу сыллар тухары хаһаайыстыба ынах-сылгы иитиитин аҕыйаппакка, олоҕу кытта тэнҥэ хаамсан, араас бырагыраамаларга үлэлэһэн хаһаайыстыбатын сайыннаран кэллэ. Төхтүргэ биир да күн өрөөбөт ас-таҥас атыылыыр маҕаһыыннаах. Манна өр сыл үлэлиир Туяра Алексеева дьон-сэргэ наадыйар, туттар тэрилин толору хааччыйар.
Кэпэрэтиип салайааччыта Тамара Осипова үлэһиттэригэр туох баар чэпчэтиилэри оҥорор, хаһаайыстыбатынан сылтан сыл араас бырагыраамаларга үлэлэһэр. 2023 сыллаахха “Хаксыктар” аһы-үөлү астыыр дьиэни бэйэлэрин күүстэринэн тутан олоххо киллэрбиттэрэ. Манна сүөһү этин эрийэн, араас тоҥ астары оҥорон атыыга таһаараллар. Кинилэр оҥорон таһаарар олохтоох бородууксуйлара куруук атыыга хамаҕатык барар. Аны туран, ферма үлэһиттэригэр сынньанан, чэй иһэн итии киллэринэр дьиэни эбии туппуттара.
ТХПК от оттуур ходуһалардаах, онон инникитин тиэхиньикэнэн толору хааччынан, сирин уотун оҥорторон олоҕу кытта тэнҥэ хамнанар, үлэни, сынньалаҥы дьүөрэлээн сайдар-үүнэр былааннардаах.
Мотрена Ефремова, Төхтүр нэһилиэгин Бэтэрээннэрин сэбиэттэрин бэрэссэдээтэлэ.