«Хаҥалас Боотур» саҥалыы тыынынан туруоруллуо

Быйыл үс улуус олоҥхолорун үйэтиппит Егор Егорович Лукин — Түммүт Дьөгүөр 105 сааһын туолла. Дьоһун киһибит үбүлүөйдээх сааһыгар анаан төрөөбүт дойдутугар Булгунньахтаахха кулун тутарга Саха сиринээҕи гуманитарнай чинчийии института, «Арчы дьиэтин» үлэһиттэрэ холбоон научнай-практическэй конференция ыыппыттара. Онно архыып үлэһиттэрэ Егор Лукин илиитинэн суруйбут матырыйаалларын киэҥ көрүүгэ таһаарбыттара.

— Бу сырыыга өрөспүүбүлүкэ Олоҥхо декадатын бырагырааматыгар киирэн «Хаҥалас Боотур» олоҥхотун  «Арчы» дьиэтин үлэһиттэрэ саҥалыы тыыннаан туруораары түбүгүрэ сылдьабыт, — диэн кэпсээтэ бырайыак ааптара Лидия Харитонова. —  Режиссёрынан Айдыс Черноградскай буолар. Оруолларга олохтоох самодеятельность кыттыылаахтара оонньуохтара, «Эркээни эдэр сааһа» норуот кэлэктиибэ үҥкүүлэргэ кыттыаҕа. Олоҥхобутун ахсынньы 5 күнүгэр Дьокуускай олохтоохторугар көрдөрөр былааннаахпыт. Үс улуус олоҥхолорун түмэн сурукка тиһэн үйэтиппит дьоһун киһибит сыралаах үлэтэ Хаҥалас, Горнай, Чурапчы улуустарыгар киэҥ эйгэҕэ дуорааннаахтык ааттатар, үйэтитэр ытык иэспит.

Инникитин бу олоҥхону ытык киһибит Андрей Саввич Борисов геокултуурунай нэһилиэстибэтин былааныгар киллэрэн Олоҥхо тыйаатырын кытта сөбүлэҥ түһэрсэн, бастакы президеммит М.Е.Николаевпыт дойдутугар, Чапаевка Олоҥхо киинин дьиэтин арыллыытыгар көрдөрдөрбүт диэн баҕалаахпыт, — диэтэ култуура үтүөлээх үлэһитэ Лидия Васильевна.

Людмила Мордовская.