Ийэ тыл, сурук-бичик күнүгэр анаммыт үтүө үгэскэ кубулуйбут “Ийэ тыл этигэн кэрэтэ” улуустааҕы бэстибээл олунньу 14 күнүгэр С.П. Ефремов аатынан Булгунньахтаах орто уопсай үөрэхтээһин оскуолатыгар буолан ааста. “Ийэ тыл этигэн кэрэтэ” улуустааҕы бэстибээл 2012 сылтан саҕалаан быйыл 14 төгүлүн ыытылынна. Бэстибээл ааптарынан буолар өр сыл үөрэҕирии салаатыгар таһаарыылаахтык үлэлээбит, кыраайы үөрэтээччи Капиталина Скрябина. Манна улуус оскуолаларын 5-11 кылаастарын үөрэнээччилэрэ, учууталлара, педагог-бибилэтиэкэрдэр, төрөппүттэр кытталлар. Бэстибээл тэрийээччилэринэн «Хаҥалас улууһа» МО култуураҕа уонна духуобунаска салаата, Хаҥаластааҕы үөрэх управлениета, Саха тылын, литэрэтиирэтин учууталларын улуустааҕы холбоһуга буолаллар.
Быйылгы бэстибээлгэ улууспут 16 оскуолатыттан 326 үөрэнээччи кыттынна. Үөрэнээччилэр 16 түһүмэхтээх араас ис хоһоонноох күрэскэ күөн көрүстүлэр. Тэрээһиҥҥэ оҕолуун-уруулуун бука бары сахалыы таҥастаах кэлэллэр, онон саха таҥаһын дьэрэкээн көстүүтэ манна буолар.
Бэстибээли арчылаах алгыһынан «Арчы Дьиэтэ” норуот духуобунай киинин дириэктэрэ, СӨ култууратын үтүөлээх үлэһитэ Лидия Харитонова арыйда. Алгыс оһуокайынан түмүктэннэ. Оҕо аймах уонна учууталлар араас түһүмэхтээх күрэстэргэ тарҕаһан, тыҥааһыннаах күөн көрсүүлэрэ саҕаланна. Бэстибээлбит 3 хайысхалаах: «Ийэ тылбыт этигэн кэрэтэ», «Олоҥхо өлбөт үйэлээх», «Ыһыах түһүлгэтэ».
Бу тэрээһин сүрүн уратытынан уол оҕону иитиигэ, уһуйууга болҕомтону ууруу буолар. «Уолан ааҕыылара» биир тиһиктээх ыытыллар буолан уол оҕолор сылтан сыл уопутуран, өйтөн ааҕар дьоҕурдара тупсан иһэр. Ол курдук, быйылгы сылга “Уолан ааҕыыларыгар” кыайыылаахтарынан орто сүһүөххэ Арсен Попов, А.В. Дмитриев аат. Ой орто оскуолатын 5 кылааһын үөрэнээччитэ, улахан сүһүөххэ Леня Максимов, Р.А Христофоров аатынан Тумул сүрүн уопсай үөрэхтээһин оскуолатын 9 кылааһын үөрэнээччитэ буоллулар. Бөлөҕүнэн ааҕыыга орто сүһүөххэ В.М. Васильева аат. 2-Малдьаҕар орто уопсай үөрэхтээһин оскуолатын уоланнарын бөлөҕө, улахан сүһүөххэ И.М. Яковлев аат. Покровскай 1 №-дээх орто уопсай үөрэхтээһин оскуолатын бөлөҕө кыайыылаах ааттаннылар.
“Өркөн өй”, “Аман өс” күрэс-тэр сылын аайы бэрт үрдүк таһымҥа ааһалларын бэлиэтиэххэ сөп. “Аман өс” күөн күрэс-кэ Адамов Ганя, И.М. Яковлев аат. Покровскай куорат 1 №- дээх үөрэхтээһин оскуолатын 11 кылааһын үөрэнээччитэ тэҥнээҕин булбата.
Норуот тылынан уус-уран айымньытын көрүҥнэригэр оһуокайга, тойукка, чабырҕахха, олоҥхону билиигэ, олоҥхону толорууга күөн көрсөллөр. ”Олоҥхоһут оҕолор” күрэскэ биирдиилээн толорууга Дархан Тихонов, 2-Малдьаҕар оскуолатын 10 кылааһын үөрэнээччитэ, бөлөҕүнэн толорууга Г.В. Ксенофонтов аат. Тиит Арыы оскуолатын үөрэнээччилэрэ кыайыы өрөгөйүн биллилэр.
Чабырҕах күрэһэр бастыҥы-нан Ой оскуолатын бөлөҕө таҕыста. «Тойук туонатыгар» кыайыылааҕынан Виолетта Данилова, С.П. Барашков аат. Хачыкаат оскуолатын 10 кылааһын үөрэнээччитэ буолла.
Маны таһынан сахалыы остуол, атах оонньууларыгар тыҥааһыннаах киирсиилэр буолуллар. Быйылгы сылга ордук бэлэмнээхтэринэн В.М.Васильева аатынан 2-Малдьаҕар үөрэхтээһин оскуолатын үөрэнээччилэрэ кыайыы өрөгөйүн биллилэр.
Дьэ ити курдук, Хаҥалас кэлэр кэскилэ “Ийэ тыл этигэн кэрэтэ” бэстибээлгэ тоҕуоруһа мустан, кыайыы өрөгөйүн билэн, үөрэн-көтөн эһиилгэ диэри тарҕастылар.
Ньургустана ТИТОВА, А.В. Дмитриев аат. Ой орто оскуолатын саха тылын, литэрэтиирэтин учуутала.