Бу күннэргэ Россия телевидениетын бары каналларынан Ленинград куората 900 ыар хонуктаах, балтараа мөллүйүөн аҥара киһи өлүүтэ сүтүктээх блокадаттан босхоломмутун кэпсиир-көрдөрөр араас документальнай матырыйааллардаах биэриилэр, уус-уран киинэлэр көстөн аастылар.
Тохсунньу 25-26 күннэригэр Дьокуускайга, Ленинград куорат блокадаттан босхоломмута 80 сылыгар ананан ыытыллыбыт тэрээһиннэргэ Хаҥалас улууһун Нөмүгү нэһилиэгин “Айар-Кут” түмсүүтүн худуоһунньуктара кытыннылар. Ол курдук Национальнай библиотека историческай саалатыгар “Театр. Якутия. Ленинград” кинигэ сүрэхтэниитигэр уонна Саха театрыгар “Оонньоммотох оруоллар” испэктээх тэрээһиннэригэр “Цветы на холодном снегу” — диэн ааттаах түрбэ (хартыына) быыстакатынан көхтөөх кыттыыны ыллылар. Быыстапка 1940 сыллаахха Орджоникидзевскай оройуонтан Ленинградтааҕы Н.Островскай аатынан театральнай институкка үөрэнэ барбыт сүүрбэччэ саастаах эдэркээн саха уолаттарын уонна кыргыттарын блокада кэминээҕи олохторун туһунан кэпсиир.
Самодеятельнай худуоһунньуктар үлэлэрин кыраайы үөрэтээччи Прокопий Ноговицын уонна художник Галина Семенова салалталарынан эдэркээн 4 уол уонна 4 кыысолоҕун чинчийэн-үөрэтэн холустаҕа түһэрбиттэр. Хартыына геройдарын 2-с Маалтааныттан төрүттээх Пелагея Борисова уонна Булгунняхтаахтан силистээх-мутуктаах Ксения Гаврильева кыргыттара, 1-кы Малдьаҕартан Макар Гаврильев аймахтара кэлэн худуоһунньуктарга истиҥник махтаннылар уонна хартыына тула хаартыскаҕа түстүлэр. Театрга кэлбит үгүс дьон быыстапканы олус сэҥээрэн көрдүлэр-иһиттилэр. Ленин куоратыгар үөрэммит студиецтарга анаммыт икки күннээх култуурунай тэрээһиҥҥэ көхтөөхтүк кыттыбыттарын иһин Хаҥалас улууһун самодеятельнай худуоһунньуктарыгар, тэрийэр хамыыһыыйа истиҥ махталын тириэртэ.
Галина Семенова.