Оскуола эйгэтэ
Хореограф Наталья Кузьмина салайар бу бэлиэ күнүн Покровскай 1 №-дээх орто оскуолата “Саргы түһүлгэтэ» култуура киинигэр саала толору көрөөччүлээх улахан кэнсиэринэн көрүстэ. Үчүгэйэ диэн манна урукку сылларга кэлэктиипкэ үҥкүүлээбит ыччаттар, ону сэргэ төрөппүттэр кытыннылар.
Кэнсиэр педагог-бибилэтиэкэр Сардаана Кириллина суруйбут сценарийынан биир тыынынан барда. Киирии тылы этэригэр оскуола дириэктэрэ СӨ үөрэҕириитин үтүөлээх үлэһитэ Спиридон Шишигин Бастакы Президеммит Михаил Николаев атын улуустарга курдук оҕо айар дьоҕурун арыйар кэлэктииби тэрийэргэ өссө 2004 сыллаахха этии киллэрбитин махтана аҕынна. Кини «Хаҥаласчаан» тэриллиэҕиттэн оройуоммут аатын ааттатар буолбутун эттэ, оскуолатын кэлэктиибигэр оҕолор төрөппүттэригэр, спонсордарыгар махтанна, ансаамбыл солбуллубат салайааччытыгар Наталья Кузьминаҕа сибэкки, Эҕэрдэ сурук туттарда уонна аан дойдутааҕы виртуоз-хомусчут буоларынан ситиһиилэри баҕаран туран хомус тардан дьүрүһүттэ.
Кырдьык, Хаҥалас бэлиэ түгэннэрэ, араас тэрээһиннэрэ бу 2004 сылтан образцовай, көрдөрүүлээх ааты сүгэр кэлэктибэ суох ааспатын кэриэтэ. «Хаҥаласчааннар» оройуоҥҥа эрэ буолбакка, дойдуга биллэр буолбуттара ыраатта. Ол курдук, араас улахан фестивалларга кыттыбыттара, саха төрүт искусствотын Турцияҕа, Болгарияҕа, Монголияҕа, Кытайга о.д.а. дойдуларга билиһиннэрэн кэллилэр. Бу барыта утумнаах, дьаныардаах үлэ түмүгэ буолара биллэр, оскуолаҕа кыра кылаастарга үҥкүү, ритмика уруога баар буолта эмиэ улахан көмөлөөх.
Отутунан сыллар тухары хореограф, СӨ култууратын, үөрэҕириитин туйгуна Наталья Кузьмина сыралаһан туран элбэх да үҥкүүнү туруоран, оҕолорго искусство бу кэрэ эйгэтин билиһиннэрэн, умнуллубат бэлиэ түгэннэри бэлэхтээн кэллэ. Кэнсиэргэ элбэх саҥа үҥкүүлэри көрдүбүт, олус астынныбыт. Ол курдук, манна кырачаан артыыстартан саҕалаан выпускниктарга тиийэ кытыннылар. Оҕолорбут ийэлэрэ барахсаттар олохтоох поэт Татьяна Петрова-Мойуу Кыыһа тылларыгар суруллубут, оскуола учуутала Алена Слепцова толорор “Ийэ мичээрэ” ырыатыгар уйдаран үҥкүүлээн тэйбиттэр кэрэ көстүү буолла. “Хаҥаласчааннар” бу киэһээ араас омук бу төрүт искусствотын билиһиннэрдилэр — монголлар, туроктар, чукоткалар, узбектар о.д. а. үҥкүүлэрин көрдөрдүлэр. Биллэн турар, сахалыы «Кыталыктар кырдаллара”, элбэх уол оҕо кыттыылаах “Хотой үҥкүүтэ”, “Хоту дойду матыыптара”, “Дьөһөгөй үҥкүүтэ», “Алгыс үҥкүүтэ” киһи салгыбакка көрөр, астынар үлэлэрэ. Уолаттары үҥкүүгэ уһуйар уустук дииллэр даҕаны, бастакы оскуолаҕа манна улахан болҕомто уурулларынан, ситиһии өрүү баар.Наталья Михайловна олус ирдэбиллээх хореограф буоларын оҕолор үҥкүүлүүр техникара, сценическэй култууралара мэлдьи үрдүгэ ону туоһулуурун көрөбүн. Элбэх киһилээх ансаамбыл хас да бөлөҕүн дьарыктыахха диэтэххэ бу улахан сыралаах, ардыгар ньиэрбэ да баранар үлэтэ буолара биллэр суол. Онон педагогка махтаныахха, сүгүрүйүөххэ!
Оҕолорбут таҥастара-саптара кэрэтэ сөхтөрдө — нүөмэртэн нүөмэргэ уларыйан истэ. Манна атах таҥаһыттан сиэттэрэн киэргэлгэ, оҕо холкутук астына, этэргэ дылы, ураты турукка киирэн үҥкүүлүүрүгэр тиийэ барыта учуоттаммыта көстөр. Кэлэктиибит кытары өр сылларга үҥкүү диэнибэйэтинэн билбит иис-уус маастара Наталья Павловаүлэлэһэн кэлбитин бу киэһээ дьоһуннук бэлиэтээн аһардылар, күндү киһилэригэр махтал суругу, сибэкки букетын сиэр-майгы быһыытынан хото туттардылар.
Оскуола кэккэ сылларга Михаил Николаев көҕүлээбит «Музыка барыбытыгар” бырайыагар кыттан утумнаахтык үлэлиирин таарыйа бэлиэтиэ этим. Оҕолор флейтаҕа, хомуска оонньуулларын таһынан аны саха төрүт инструменнарыгар оонньуурга үһуйуллан эрэллэрин кэрэхсиэххэ эрэ сөп. Бу киэһээ “хаҥаласчааннарбыт» Вероника Алексеева салайар Покровскайдааҕы Искусствооскуолатыгар тэриллибит “Кыл-кынат» кырыымпаһыттарбөлөхтөрүн тыыннаах музыкаларынан доҕуһуолланан аан бастаан улахан сыанаҕа үҥкүүлээтилэр! Кэнсиэргэ оҕолору, ону сэргэ ити ансаамбылы Дьокуускайтан сылдьан дьарыктыыр СӨ Эстрада национальнай тыйаатырын артыыһа, култуура туйгуна Дьулустаан Никифоров кытынна, бэйэтэ кытары нүөмэрин бэлэхтээн үөрдүбүтэ кэнсиэри байытта. Оскуола салалтатыттан, педагогическай кэлэктииптэн, төрөппүттэртэн өйөбүл баар буолан талааннар утары бараллар, ситиһии кэлэр.
Үбүлүөйүнэн сибээстээн, улахан үлэни бэлиэтээн бу киэһээ “Хаҥаласчаан” салайааччытыгар Наталья Кузьмина аатыгар үгүс үтүө тыл этитиннэ — Саха өрөспүүбүлүкэтин култуураҕа уонна дуобунай сайдыыга министиэристибэтинаатыттан өрөспүүбүлүкэ история уонна култуура өйдөбүнньүктэригэр управлениетын салайааччыта Николай Макаров, улуустааҕы култуура управлениетыттан Сергей Павлов, Үөрэх салалтатыттан Надежда Скрябина, Искусство оскуолатыттан дириэктэр Вероника Алексеева, төрөппүттэртэн, выпускниктартан о.д.а. эҕэрдэлээтилэр, сибэкки кэрэтин, махтал суруктары, харчынан бэлэҕи туттардылар. Наталья Кузьмина тэрээһиҥҥэ бары кыттыбыт дьоҥҥо, бастатан туран, үөрэтэр, үөрэппит оҕолоругар махтанна. Бу кэнсиэркэ кэлбит көрөөччүлэр билиэттэриттэн киирбит 110 тыһ. солк. “Хаҥаласчаан»ансаамбыл саҥа көстүүмнэри тиктэригэр ананна. Оҕолорбутугар ситиһиилэри баҕарыаҕыҥ!
Людмила Аммосова.
Хаартыскалар — ааптартан уонна оскуола кэлэктиибин архыыбыттан.