Өрөспүүбүлүкэ сиригэр-уотугар эрэгийиэннээҕи уонна федеральнай таһымнаах ыксаллаах быһыы-майгы эрэсиимэ салҕанар. Маны сэргэ муниципальнай таһымнаах ыксаллаах эрэсиимнэр Абый, Бүлүү, Дьааҥы, Үөһээ Бүлүү, Ленскэй, Уус Маайа, Өлүөхүмэ улуустарыгар бааллар.
Хаҥаласка балаһыанньа этэҥҥэ, 9 баһаар буола сырытта. Өлүөхүмэ улууһугар улууспутуттан ойуур баһаарын кытары охсуһа Уулаах Аантан, Нөмүгүттэн, Покровскайтан 11 киһилээх биригээдэ барбыта икки ый буолла. Бастакы бөлөҕү Пантелеймон Терентьев салайар. Кинини кытары Сергей Латышев, Петр Жуков, Эдуард Иннокентьев, Герасим Устинов, Альберт Попов бартара. Иккискэ – Тимофей Филипповы кытары Антон Киприянов, Илья Кельциев, Мичил Попов, Анатолий Ушницкай сылдьаллар.
Ааспыт нэдиэлэҕэ 3 киһи — Евгений Неустроев, Семен Самсонов уонна Еремей Прокопьев Уулаах Аантан уонна Покровскайтан Үөһээ Бүлүү улууһугар суһал көмөҕө бартара.
Маны таһынан Покровскай куораттан 50 км. тэйиччи сытар Дьороно сиригэр ойуур баһаарыгар дьоммут араас анал тиэхиньикэлээх тиийэн үс күн үлэлээн уоту умуруортара. Бу туһунан СӨ экологияҕа айылҕаны туһаныыга уонна ойуур хаһаайыстыбатыгар министиэристибэ «Якутлесресурс» САТ Хаҥаластааҕы салаатын директора Авксентий Слепцов иһитиннэрдэ.
Татьяна Владимирова.