Бу кинигэ сүрэхтэниитэ бүгүн Покровскайга «Саргы түһүлгэтэ» култуура киинигэр Өрөспүүбүлүкэ күнүн көрсө буолла. Кинигэ Хаҥаластааҕы Г.В. Ксенофонтов аатынан улуустааҕы кыраайы үөрэтэр түмэл, Улуустааҕы кииннэммит бибилэтиэкэ, култуура уонна духуобунай сайдыыга управление материальнай суох култуура нэһилиэстибэтигэр салаатын фондатын, «Сахабэчээт» САТ “Хаҥалас” (“Хангалас”) хаһыат редакциятын, Хаҥаластааҕы оҕо-спортивнай оскуола, “Хаҥалас улууһа” МО дьаһалтатын муниципальнай архыыбын, А.А. Куприянов тус архыыбын матырыйаалларыгар олоҕуран таҕыста. Бэлэмнээн таһаарааччыларынан бибилэтиэкэ үлэһиттэрэ Тамара Свинобоева, Маргарита Федорова буоллулар. Матырыйааллары түмүүгэ А.А. Куприянов, Г.Д. Семенова, М.Д. Семенова, Н.Г. Тимофеева киин бибилэтиэкэ дириэктэрэ И.И. Адамова салайыытынан кытыннылар, консультаннарынан К.Г. Скрябина, Л.Д. Аммосова буоллулар.
Кинигэ-альбомҥа 1922-2022 сылларга, 100 сыл иһигэр, туох событиелар буолбуттара хронология быһыытынан элбэх сэдэх хаартыскаларынан бигэргэтиллэн киллэрилиннэ. Киирии тылы улуус баһылыга Олег Иринеев, култуура управлениетын салайааччыта Фекла Варламова суруйдулар. Кинигэ олорон кэлбит кэммит бэлиэ тутууларын, чулуу дьонун үлэҕэ ситиһиилэрин, промышленность,тыа хаһаайыстыбатын, үөрэх, култуура, спорт о.д.а. тэрилтэлэрэ арыллыыларын, үлэҕэ чаҕылхай ситиһиилэрин көрдөрөр, тус-бас дьонун туһунан фактары сырдатар.
Кинигэ сүрэхтэниитигэр үгүс киһи тылы эттэ, «Хангаласский гронограф» улууспут дьонугар-сэргэтигэр остуол кинигэтинэн буолуоҕа диэтилэр.
Сиһилии «Хаҥалас» хаһыаттан уонна сайтыттан билсээриҥ.
Людмила Мордовская.