Атырдьах ыйын 23-24 күннэригэр Кыргызстан Өрөспүүбүлүкэтин киинигэр Бишкек куоракка ыытыллыбыт аан маҥнайгы Хапсаҕайга аан дойду чөмпүйэнээтэ ситиһиилээхтик түмүктэннэ.
Бу саха спордун историятыгар улахан суолталаах тэрээһиҥҥэ араас дойдуттан 91 күүстээхтэн күүстээх аан дойду чөмпүйүөннэрэ кытыннылар. Арассыыйа 24 спортсмена, олортон 15 саха бөҕөстөрө кыттан 6 кыһыл, 6 үрүҥ көмүс, 3 боруонса мэтээли ыллылар. Ону тэҥэ хамаанда састаабыгар Бурятияттан, Тываттан, Хакасияттануонна Алтай тустууктара киирбиттэрэ. Арассыыйа хамаандатын састаабыгар кыттар саха спортсменнара: чөмпүйүөннэринэн 57 киилэҕэ Пантелеймон Николаев, 65 кг — Петр Константинов, 75 — Тимур Николаев, 85 — Роман Николаев, 95 — Николай Николаев, 95 киилэ үөһэ — Никита Хабаров буоллулар.
Биһиги биир дойдулаахпыт Даниил Иванов ыйааһыныгар 20 спортсмен туһунна. Азербайджан биир күүстээх бөҕөһүн Хасая Юсифовы баара-суоҕа 2 сөкүүндэнэн бырахпыта, бу бэйэтэ туспа рекорд. Никита Хабаровы кытта финалга эрбии биитин, эппиэс тааһын курдук тэҥҥэ эрийсэн баран албас оҥороору хотторон кэбистэ... Хапсаҕайбиһиги чулуу бөҕөстөрбүт бүтүн аан дойду үрдүнэн ситиһиилээхтик тусталларыгар тулхайдыйбат тирэҕинэн буолла. Даниил «түргэннээһин» курдук албас Аан дойду түһүлгэтигэр тахсарыгар хардыыны көрдөрдө. Оҥорбут “түргэн” албастара бастыҥ бөҕөстөрбүт сэбилэниилэригэр киирэн истиннэр! Никита Хабаров кэнниттэн кини иккис миэстэлэннэ, үһүскэАюр Нимаев (Бурятия-Арассыыйа), Самдан-Демир Хайа (Тыва-Арассыыйа) таҕыстылар.
Муҥутуур кыайыылаах спортсменыгар 3000 доллары, саха ювелир маастара оҥорбут бриллианнаах куру уонна батыйаны туттардылар. Алта ыйааһыҥҥа чөмпүйүөннэргэ 500-түү доллары, үрүҥ көмүстэргэ – 300-түү, боруонса призердарга – 200 доллары биэрдилэр.
Турнирга 75 киилэҕэ дылы 40 бөҕөс туһунна. Муҥутуур кыайыылааҕынан Сандан Гармаев (Бурятия-Арассыыйа) буолла.
75 киилэттэн үөһэ ыйааһыннаахтарга 34 спортсмен баара. Ол курдук, атырдьах ыйын 23 күнүгэр Бишкек куоракка “курэш”диэн күрэхтэһиигэ аан дойду иккис чөмпүйэнээтин үрүҥ көмүс призера Амгаланбаатар Нямсурэн (Монгол) хапсаҕайга аан дойдутааҕы бастакы чөмпүйэнээтин күрэҕэр муҥутуур кыайыылааҕа буолла.
Вячеслав Семенович Константинов көбүөргэарбитр судьуйатынан уһун кэмҥэ үлэлээтэ, тустуу быраабылата уларыйдаҕын аайы, ону лоп—бааччы билэн-көрөн сыысхала суохтук үлэлиир. Вячеслав Семенович хапсаҕайдаһан тустууга Саха сиригэр тарбахха баттанар биир опыттаах судьуйа. Ис дьыала бэтэрээнэ, “Хаҥалас хапсаҕайыгар” аҕыс төгүл ыйааһыныгар кыайыылаах аатын сүкпүт, СӨ спордун хапсаҕайдаһан тустууга маастара, СӨ муҥутуур кыайыылааҕа. Бу Аан дойду чөмпүйүөнээтигэр хапсаҕайга судьуйалаата, эппиэттээх тустуу судьуйатыгар ситиһиилээхтик үлэлээтэ. Даниил Ивановка уонна Вячеслав Семеновичка инникитин да ситиһиилэри баҕарыаҕыҥ!
Василий МОЖУКОВ, СӨ успуордун бэтэрээнэ, Покровскай к.