Саҥа дьылы көрсө
Улуустааҕы көрбөттөр обществолара Саҥа дьыллааҕы тэрээһиннэрэ Покровскайга Арчы дьиэтигэр бэрт сэргэхтик тэриллэн ааста.
Араас нэһилиэктэртэн кэлэн үүнэр сылы астына көрүстүлэр. Улахан Аантан Вера Македонова салайар «Көмүлүөк»түмсүүттэн аҕыс далбар-хотун ыалдьыттаан ырыа-тойук бэлэхтээн үөртэ.
Быйыл хаҥаластар обществоларыгар бэлиэ түгэн үгүс буолла. Бүтүн россиятааҕы көрбөттөр обществоларын 70 сылынан “Булгуруйбат дьулуур” диэн кинигэни салайааччы Ольга Владимирова көхтөөх дьонун көмөтүнэн бэлэмнээн таһаарда. Бу сыл Покровскайтан көрөрүттэн мэлийбит эдэр поэт Натали Добрянцева үһүс кинигэтэ күн сирин көрдө. Общество чилиэннэрэ 90 саастаах Зоя Ким, 87-лээх Валентин Оленов саҥа тутуллубут таас дьиэҕэ олохтоох дьаһалтаттан кыбартыыра ыллылар.
Көрбөттөр обществолара улууска ыытыллар тэрээһиннэргэ көхтөөхтүк кыттар – быыстапкаларга, спортивнай күрэхтэргэ о.д.а. Манна барытыгар көҕүлээччинэн олоххо ураты көрүүлээх салайааччылара Ольга Владимирова буолар.
Дьэ, ити курдук, харахтарынан мөлтөх дьон бэркэ сэргэхсийэн Арчы дьиэтин арчыланан тарҕастылар.
Людмила Мордовская.
(хаартыскалар – общество архыыбыттан)