Төхтүр нэһилиэгин «Саһарҕа» пенсионердар түмсүүлэрэ алын сүһүөх кылаас үөрэнээччилэригэр «Уруйдуубут Улуу Кыайыыны!» диэн тэрээһин ыыттыбыт.
Алын сүһүөх кылаастартан 3-4-түү үөрэнээччи кытынна. Оҕолор араас ааптардар Аҕа дойду сэриитин тематыгар суруйбут хоһооннорун үөрэтэн, хас биирдии хоһоону истээччигэ тиийэрдии, төрөөбүт тылларынан дорҕоонноохтук аахтылар.
Иккис түһүмэххэ А.И.Борисов аатынан Култуура киинин художественнай салайааччыта Дария Петрова тэттик хоһооннору хайдах өйтөн айан суруйуохха сөбүн кэпсээн оҕолор болҕомтолорун тарта.
Өйтөн ааҕыы түмүгүн СӨ үөрэҕириитин туйгуна, үлэ бэтэрээнэ, Учууталлар учууталлара, аҕа уһуйааччы Клавдия Афанасьева таһаарда, түмсүүбүт аатыттан Биһирэбил, Добун суруктары, бэлэхтэри туттардыбыт.
Санатан эттэххэ, биһиги ааспыт сылтан төрөөбүт сахабыт тылынан көҥүллүк саҥарыыны, өйтөн ааҕыыны, суруйууну көҕүлүүр соруктаах бырайыак оҥорон оскуоланы кытта үлэлэһэбит. Инникитин маннык ааҕыылар араас темаларга ыытыллаллара былааннанар.
Мотрена Ефремова, Төхтүр с.