5-летие ямщицкой культуры в республике
Кулун тутар 1 күнүгэр Хаҥалас улууһун Булгунньахтааҕар дьаамсыктар култуураларын сырдатар, сайыннарар биэссылын чэрчитинэн «Разыграйся гармонь ямская» диэн сэргэх тэрээһин буолан ааста.
Бу күн улуус хас да нэһилиэгиттэн уонна Дьокуускай куораттан 10-тан тахса хормуоскаһыт уонна 50-ча нуучча норуотун ырыаларын толорооччулар мустан бэйэлэрин талааннарын, айар үлэлэрин көрдөрдүлэр, уопут атастастылар. Улуу нуучча норуотун ураты кэрэ ырыалара дуорайа көттүлэр.
Айан ырааҕын аахсыбакка Кытыл Дьураттан бырааттыы Добрянцевтар, Үөдэйтэн Винокур Асекритов, Евгений Лугинов, Владимир, Василий Филипповтар, Сиинэттэн — Михаил Золотарев, Тиит Арыыттан Людмила Федорова салайааччылаах “Ленские зори” ырыа бөлөҕө, Булгунньахтаахтан Геокла Петрова салайааччылаах “Сударушка” бөлөх, Тойон Арыыттан Евдокия Корякина, СӨ култууратын туйгуна, мелодист, хормуоскаһыт, баянист Валерий Варфоломеев, ыаллыы Бэстээх нэһилиэгиттэн “Сударушка” бөлөх, хормуоскаһыттар — Александр Галкин, Николай Наумов, көмүс куоластаах частушкаһыт Зинаида Добрянцева, Мохсоҕоллоохтон – Нина Мучкаева салайар «Бубенцы над Леной», Покровскай куораттан Анастасия Павлова “Ямщицкий перезвон”, Дьокуускай куораттан СӨ култууратын үтүөлээх үлэһитэ Ирина Стрекаловская “Ямские бубенцы” бөлөхтөрө кыттан уоттаах-күөстээх ырыаларынан дьону-сэргэни үөртүлэр.
Дьоһун тэрээһиҥҥэ бочуоттаах ыалдьыт буолан “Потомки государевых ямщиков” түмсүү салайааччытын солбуйааччыта, СӨ тыатын хаһаайыстыбатын үтүөлээх үлэһитэ, Өлүөхүмэ улууһун бочуоттаах олохтооҕо Василий Кулагин, СӨ тутуутун бэтэрээнэ, улуус бочуоттаах олохтооҕо, РФ бочуоттаах тутааччыта Анатолий Соколов кэлэннэр мустубут дьону эҕэрдэлээтилэр, Махтал суруктары туттардылар. Маны таһынан “Потомки государевых ямщиков” түмсүү салайааччыта Ирина Стрекаловская дьаамсыктар түмсүүлэрин анал наҕараадаларын – “Ямская Грамота” диэни уонна анал авторскай оҥоһуктаах чаһыларын бэлэх туттартаата.
Түмүккэ кэлбит ыалдьыттар, тэрээһин кыттыылаахтара тириилэрэ тэнийиэр диэри хормуосканан, байаанынан астына үҥкүүлээн битийдилэр, дуоһуйа ыллаатылар, частушкалаатылар.
Бырайыак автора, тэрийээччитэ, СӨ култууратын туйгуна, хормуоскаһыт, баянист, ырыаһыт, мелодист Валерий Варфоломеев буолар. Кини ыҥырбыт дьоно бары көхтөөхтүк, күргүөмүнэн кэлэн кыттан үөрэн-көтөн, астынан махтал тылларын этэн, өссө да өрүү көрсө туруох буолан дуоһуйан тарҕастылар.
Ирина Давыдова, култуура үлэһитэ, Булгунньахтаах сэл.