Хорсун буойун Иннокентий Михайлов кэриэһигэр

Нөмүгү нэһилиэгэр анал байыаннай дьайыы кыттыылааҕа, «Хорсунун иһин» уордьан кавалера Иннокентий Михайлов сырдык кэриэһигэр “Бары бииргэ” патриотическай ыччат слета 2-с төгүлүн ыытылынна. Тэрээһиҥҥэ улуус баһылыгын солбуйааччы Юрий Никифоров, Хаҥаластааҕы Оҕону эбии үөрэхтээһин киинин дириэктэрин солбуйааччы Наталья Шадрина кыттыыны ыллылар.

Слекка барыта 5 хамаанда кытынна. Ол иһигэр олохтоохтор Нөмүгү ыччаттара, Дьэр нэһилиэгин кэскиллэрэ, Арктикатааҕы агротехнологическай университет Өктөмнөөҕү филиалын студеннарын хамаандата, Покровскайдааҕы колледж студеннара уонна Дьокуускай куораттан “Дархан” Хаҥалас улууһун ыччаттарын түмсүүтүн хамаандалара бааллар.

“Бары бииргэ” ыччат сүлүөтэ икки түһүмэхтээх ыытылынна. Тэрээһин маҥнайгы сүһүөҕэ культурнай-интеллектуальнай хайысхалаах буолла. Манна, КВИЗ уонна дьыалабыай оонньуулар, тэҥнээхтэр кэпсэтиилэрэ ыытылынна. Иккис сүһүөҕүнэн спортивнай күрэхтэһиилэр — сыал ытыытыгар, төрүт оонньууга кубиктары хомуйууга, байыаннай эстафетаҕа, канаат тардыһыытыгар илин-кэлин түһүстүлэр. Зачету таһынан кыргыттар олорон эрэ көҕүстэрин көтөҕүүгэ – А.В. Дмитриев аатынан Ой орто оскуолатын физкультураҕа учуутала Деянира Баишева, оттон эр дьон перекладинаҕа тардыныыга Виктор Жирков уонна миэстэттэн ырааҕы ыстаныыга Андрей Шелканов, үһүөн Нөмүгү хамаандатыттан муҥутуур кыайыылаахтарынан буоллулар. Уопсай түмүккэ, Дьэр нэһилиэгин ыччаттарын хамаандата бастаата (хапытаан Анастасия Соломонова) уонна 50 тыһ. солк. харчынан, дьоһуннаах Куубагынан наҕараадаланнылар. Иккис миэстэҕэ Арктикатааҕы агротехнологическай университет Өктөмнөөҕү филиалын студеннарын хамаандата (хапытаан Афанасий Пантилов) таҕыста уонна 30 тыһ. солк. туттулар. Үһүс бочуоттаах миэстэҕэ Нөмүгү эдэр дьоно (хапытаан Олеся Афанасьева) тигистилэр, сыаналаах бириис туттулар.

Эт-хаан өттүнэн сайдыылаах, аныгы технологиялары баһылаабыт, байыаннай сулууспа мындырдарыгар бэлэмнээх, дойдуга бэриниилээх ыччаттары иитэр сорук барыбыт иннибитигэр турар. Билигин ыччат чөл олоҕу таһынан, эт-хаан, өй-санаа өттүнэн бэлэмнээх буолууларыгар спордунан уонна физическэй култууранан тиһиктээхтик дьарыктаналларыгар болҕомто ураты ууруллар. Оттон хорсун буойун Иннокентий Михайлов үтүө аата көлүөнэттэн көлүөнэҕэ бэриллэн, үйэтитиллэ туруоҕа.

Уйбаан УЙГУУРАП.