Хоточчу эр дьонугар «Байанай бэлэҕэ» тэрээһин ыытылынна. Манна булду сэҥээрээччилэргэ анаан кинигэ, сурунаал, туһалаах сүбэлэр быыстапката турда. Ону сэргэ, булт-алт тиэмэтигэр билиини тургутар, өйү-мэйиини үлэлэтэр, толкуйдатар, үс түһүмэхтэн турар оонньуу буолла.
Сытыы киирсии түмүгүнэн олохтоох ОДьХХ үлэһиттэрэ Алексей Николаев уонна Илья Заболоцкий кыайыылаах буоллулар. Бириистээх 2-с миэстэҕэ оскуолаттан Дмитрий Матвеев уонна Иван Дмитриев тигистилэр, эдэр уолаттар Василий Матвеев уонна Андрей Черноградскай 3 миэстэ буолан Сынньалаҥ киинэ туруорбут бириистэрин туттулар.
Киэһэни Иван Дмитриев ыллаан киэргэттэ, кэрэ аҥардар «Аныгы кусчуттар» диэн көрдөөх сценка туруоран мустубут дьону күллэрэн сэргэхситтилэр.
Саха сиригэр Үлэ, Хаҥалас улууһугар Тыа хаһаайыстыбатын сылынан Хоточчубут сорсуннаах кадровай булчута Петр Матвеев олорон, үлэлээн ааспыт кэмнэрин ахтан-санаан аастыбыт. Кини оҕолоро аҕаларын аатын үйэтитэн, сыал ытыыга 5 000 солк. сууммалаах анал бириис туруордулар. Сыал ытыыга сытыы харахтааҕынан Илья Заболоцкий буолан Кылаан бирииһи ылла. Оттон Григорий Леверьев бастаата, иккис миэстэ Марк Васильев, үһүс – Айсен Ксенофонтов буоллулар.
«Саамай эдэр сыал ытааччы» диэн номинацияҕа 3 000 солк. суумалаах бирииһи Зинаида, Дмитрий Матвеевтар дьиэ кэргэннэрэ туруорбуттарын Марк Васильев ылла.
Саха эр киһитин төрүт дьарыга булт буоларын биһиги эр дьоммут бу киэһэ көхтөөх кыттыыларынан көрдөрдүлэр, бигэтик туоһулаатылар.
Лира Ядреева.