Хаҥалас улууһугар Иһит сэлиэнньэтэ быйыл 61 ынах сүөһүнү, ол иһигэр 61 ыанар ынаҕы, 211 сылгыны кыстыкка киллэрбитэ. Иһиттэр сайын от бөҕөтүн оттоон кыһыны эрэллээхтик көрсөллөр.
Бүгүн мин кимнээҕэр да элбэх сүөһүнү, 20 хороҕор муостааҕы, кыстатан түбүк үөһүгэр сылдьар биир дойдулаахпыт Октябрина Федотовна Максимова туһунан сырдатан ааһыахпын баҕарабын. Бу улахан ыал далбар-хотуна күннэтэ аҕыс ынаҕы ыан, үүтүн астаан олорор. Ону таһынан хотонугар икки хаастаах, 45 кууруссалаах, күн иллэҥ суох киһи.
Октябрина Федотовна кыра эрдэҕиттэн сүөһүгэ сыстаҕас. Ийэтэ Мария Михайловна, аҕата Федот Семенович Максимов, сэрии кыттыылааҕа, Нохоройго сүөһү иитиитигэр үйэлэрин тухары үлэлээбит дьон этилэр. Онон кини үлэҕэ үөрүйэх. Кэргэнинээн Петр Мурашовтуун биэс оҕону атахтарыгар туруордулар. Билигин 17 сиэн, биир хос сиэн олохторун салгыыллар. Биллэн турар, итиччэ элбэх сүөһүнү көрөргө, отун оттуурга ыччаттара күүс-көмө буолаллар. Үчүгэйэ диэн уоллара Юрий, кыыстара Екатерина Иһиккэ олороллор, оҕолорунаан өрүү чугастар, хортуоппуй олордуутугар, хостонуутугар, оҕуруот көрүүтүгэр эҥин илии-атах буолаллар.
Октябрина Федотовна үү таһы кыралаан атыылаан харчылаһар. Иһиккэ сүөһү туппат ыал үгүс, онон үрүҥ астанан абыраналлар.
Туруу үлэһит далбар-хотун Октябрина Сухановаҕа, кини дьиэ кэргэнигэр этэҥҥэ буолууну баҕарыаҕыҥ!
Мария Максимова, бибилэтиэкэр. Иһит сэл.