Үөрэх кыһата
«Айтыын» цифровой технология колледжа муус устар 22 күнүттэн бэс ыйын 5-гэр диэри эбии үөрэхтээһин бырагырааматын чэрчитинэн иискэ сыһыаннаах уонна иистэниэн баҕалаах дьоҥҥо идэни үрдэтии курсун ыытта. Бу «Ыһыаҕы көрсө саха мааны таҥаһа» диэн ааттаах курсу СӨ, Хаҥалас улууһун норуотун маастара, талба талааннаах иистэнньэҥ Анисия Фадеева ыытта.
— Биһиги колледжпыт маннык курстары хаһыс да сылын ыытар. Бу сааскыттан саҕаламмыт иис курсугар Покровскай куорат алта олохтооҕо үөрэннилэр. Кинилэр бэйэлэрин матырыйаалларынан Анисия Кузьминична салалтатынан халадаай уонна ким баҕалаах мааны кэһиэччик тигиннилэр. Үөрэх төлөбүрдээх, 15 тыһ. солкуобай. Түмүккэ бары үөрэммиттэргэ идэни үрдэтии курсун ааста диэн Сибидиэтэлистибэ туттарабыт. Инникитин Анисия Кузьминичнаны кытта салгыы үлэлэһэр былааннаахпыт.Билигин, сайыҥҥы ыйдарга, аны аччыгый суудуналары ыытааччыларга (судоводителларга) курс ыытабыт, баҕалаахтары кэлэн үөрэниҥ диэн ыҥырабыт. — диэн «Айтыын» эбии үөрэхтээһинин педагога Елена Петрова кэпсээтэ.
Ольга Гермогенова.