Алтынньы бүтүүтэ «Илии сылааһа» өрөспүүбүлүкэтээҕи иис сыаҕын Хаҥаластааҕы филиалын иистэнньэҥнэрэ «Саргы Түһүлгэтэ» Култуура киинигэр киэҥ-куоҥ хостонор буолбуттарын туһунан суруйан турабыт.
Бу күннэргэ иистэнньэҥнэр миигин ыҥыран үлэлии олорор кабинеттарын көрдөрдүлэр. Чахчы, эрдэ үлэлии олорбут хосторуттан быдан киэҥ кабинеттаммыттар. Иистэнньэҥнэр бары бииргэ мустан тэҥинэн үлэлиир кыахтанныбыт диэн үөрүүлэрэ муҥура суох. Чуолаан, Култуура киинин салайааччытыгар Лариса Владимироваҕа хаһыаппыт нөҥүө барҕа махталларын тиэрдэллэр.
Альбина Лукина салалтатынан Зоя Семенова, Наталья Афанасьева, Татьяна Наумова, Анна Тихонова уонна Маргарита Решетникова састааптаах «Эркээни иис» байыаннай дьайыы кыттыылаахтарыгар буор-босхо араас таҥаһы тигэн көмөлөспүттэрэ балтараа сыл буолла. Үлэлиир усулуобуйалара тупсан үлэ таһаарыыта да үрдээбит: биир ый иһигэр номнуо 14 халыҥ истээх кыһыҥҥы куртканы уонна 17 флис куртканы тигэн бэлэмнээбиттэр. «Ол быыһыгар төһөлөөх тактическай ырбаахылары, футболкалары, ыстааннары тикпиппитин ааҕа да барбаппыт. Таҥаспытын-саппытын отчуоттаары гыннахпытына бэлиэтэнэр тэтэрээппитин көрөн соһуйабыт эрэ», — дэһэллэр үлэ умсулҕаныгар ылларбыт Далбар хотуттар.
Соторутааҕыта Зоя Николаевна Москваҕа оҕолоругар сынньана сылдьан производственнай иистэнэр массыына мотуорун булан аҕалбыт. Дьүөгэлэр ону бэйэлэрин үптэринэн уйуммуттар. Онон үс массыыналанныбыт диэн астына кэпсээтилэр. Таарыйа эттэххэ, бу ыйааһыннаах тэрили аҕалалларыгар Уйбаан Уйгуурап салалталаах Аҕа сүбэтин кыттыылаахтара иистэнньэҥнэр көрдөһүүлэрин быһа гыммакка, остуоллуун, атахтыын таҥан туруоран биэрбиттэр.
«Өссө эбии маннык халыҥ таҥаһы тигэргэ анаммыт күүстээх, кыамталаах массыыналанарбыт буоллар», — диэн ыра санаалаахтар дьүөгэлэр. Саҥа дьыл алыптаах күннэригэр баҕа санаа туолар диэн өйдөбүл баар, онон, баҕар, бу амарах сүрэхтээх дьахталлары биир эмэ урбаанньыт, дьокутаат өйүүрэ буоллар уонна иистэнньэҥнэр саамай наадыйар тэриллэрин бэлэхтээтэллэр диэн испэр бүк эрэнэ хаалабын.
Ольга Гермогенова.