4-с Малдьаҕар нэһилиэгин «Кулуһун» дьахталлар Сэбиэттэрин ыҥырыытынан Сиинэ дьахталларын түмсүүтүн кыттыылаахтара Ийэ күнүн чэрчитинэн Үөдэйгэ бараммыт уопут атастаһан, биэс көрүҥҥэ күрэхтэһэн, ыллаан-туойан, дуоһуйа сынньанан кэллибит.
Үөдэй сиригэр үктэнээти кытта биһигини «Истоки» библиотека -музейга салайааччы Галина Макарова үөрэ-көтө тоһуйда. Музейга киирэн билбэтэхпитин биллибит, көрбөтөхпүтүн көрдүбүт. Бу түмэл экспонаттара элбэҕэ сөхтөрөр, араас оҥоһуктар, хаартыскалар киһи хараҕын үөрдэллэр. Улахан үлэ барбыта көстөр.
Музейтан астынан аны тэрээһиммит буолуохтаах «Вечерка» Култуура киинигэр тиийдибит. Манна дириэктэр Евдокия Асекритова, дьахталлар Сэбиэттэрин салайааччыта Галина Скрябина үөрэ-көтө көрсөн тэрээһиммит саҕаланна. Бастаан полимернай туойтан кулон оҥорууга маастар-кылааһы Евдокия Егоровна бэйэтэ ыытта. Хас биирдиибитигэр туттар матырыйаал тарҕатан тус бэйэбитигэр кулон оҥоһуннубут.
Салгыы олохтоох кэрэ аҥардары кытта дартска, дуобакка, хаамыскаҕа, хабылыкка уонна корнхол диэн саҥа оонньууга күрэхтэстибит. Сиинэлэр бу күрэххэ бастаан Кубогынан уонна грамотанан наҕараадаланныбыт.
Биһиги, Сиинэ дьахталларын сэбиэтэ Үөдэй саамай ытык кырдьаҕас ийэтигэр — Ольга Васильевна Макароваҕа уонна саамай эдэр ийэҕэ — Каролина Максимоваҕа, ону таһынан олохтоох Дьахталлар сэбиэттэригэр бэлэх туттардыбыт.
Култуура киинин үлэһиттэрэ, түмсүү кыттыылаахтара толору астаах, итии чэйдээх мааны сандалыны бэлэмнээбиттэр. Ол тула олорон ирэ-хоро кэпсэтэн, араас остуол оонньуутун оонньоон, дуоһуйа сынньанан кэллибит. Бу айаммытыгар сыыдам сырыылаах суоппарбыт Валерий Шадрин илдьэ сырытта, киниэхэ барҕа махталбытын тиэрдэбит!
Ульяна Степанова, Сиинэ с.