«Кэскил» уһуйааҥҥа Төрөөбүт тыл уонна сурук-бичик күнүн бэлиэтээтибит. Тэрээһиҥҥэ Виктория Киприянова хомус алыптаах дьүрүскэн тыаһынан, хомуһуннаах хоһуйуутунан мустубут дьон кутун тутта. Орто бөлөх иитиллээччилэрэ чабырҕаҕы ааҕан лабыгыраччы толордулар.
Хоһоон күрэҕин кыра бөлөх иитээччитэ Наталья Скороходкина салайан ыытта. Дьүүллүүр сүбэҕэ уһуйаан сэбиэдиссэйэ, СӨ үөрэҕириитин туйгуна Юриянна Трофимова, «Сарыал» КК испэсэлииһэ Любовь Борисова уонна мин үлэлээтибит. Оҕолорбут бииртэн биир чуор куоластарынан хоһоон ааҕан чугдаарбыттарыгар бэйэбит да долгуйдубут. Кыра бөлөххө 1 истиэпэннээх лауреат аатын Тарасова Айыына ылла. 2 истиэпэннээх Исакова Сайаана буолла уонна 3 истиэпэннээх лауреат Кириллина Нарыйаана ааттанна. Орто бөлөх оҕолоругар Ева Евсеева «Детсадпын таптыыбын» хоһоону ааҕан кыайыылаах буолла, 2-с Арсалан Очиржапов, 3-с — Айсен Борисов. Улахан бөлөххө Никифорова Маша бастаата, 2-с миэстэ — Алиса Федорова, 3-с миэстэ Иванов Витя буоллулар. Бэлэмнэнии бөлөххө Сыромятников Рустам кыайда, 2 истиэпэннээх лауреат Алексеева Рада уонна 3-с истиэпэннээх лауреат Шадрина Василиса буоллулар.
Иитээччилэр оҕолор талааннарын арыйан, дьоҕурдарын уһугуннаран, эйэҕэстик сыһыаннаһан төрөөбүт дойдуларыгар, ийэ тылларыгар тапталы иҥэрэргэ дьулуһалларын үрдүктүк сыаналаатыбыт.
Анастасия Мордовская, Тиит Эбэ с.