Маннык ааттаах биир эриэккэс киэһэ Өктөмҥө А.С.Данилова аатынан «Барҕарыы» култуура киинигэр буолан ааста Россияҕа Аҕа, Өрөспүүбүлүкэбитигэр Ийэ күнүгэр аналлаах истиҥ көрсүһүү элбэх дьону түмтэ.
Дьиэ кэргэн диэн өйдөбүлү хас биирдии киһи тапталы, дьоллоох оҕо сааһы, бигэ олоҕу кытта ситимниирэ саарбаҕа суох. Кырдьыга даҕаны, киһи буолар сыаннастар аан бастаан дьиэ кэргэҥҥэ иитиллэллэр. Төһөннөн элбэх дьиэ кэргэн иллээхтик, эйэлээхтик, сиэрдээхтик, уопсай сыаллаах-соруктаах олорор да, соччонон биһиги уопсастыбабыт чөл туруктаах буолар. Дьиэ кэргэн тутулун, туругун ийэлээх аҕа иккиэн туталлар. Саха ыала – бу өрүү эйэҕэс, ис киирбэх, киһи кута-сүрэ тохтуур, дууһатын сылаанньытар ытык эйгэ, нус-хас олох эргийэр киинэ, кэскили түстүүр, түктэри быһыыны дьалты хаамар сиэр-туом уйата буолар. Ыал ууһуохтаах – тэнийиэхтээх.
Ол иһин бүгүн Ийэни уонна Аҕаны айхаллыыр биэчэри Өктөм орто оскуолатын “Күн күлүбүрэ” үҥкүү бөлөҕө (салайааччы Мария Угапьева) “Оһуор үҥкүүтүнэн” уонна 8 кылаас үөрэнээччилэрэ ийэлэр тустарынан олус истиҥ нууччалыы ырыанан саҕалаатылар. Дьэ онтон бииртэн биир күрэхтэргэ ийэлэр, аҕалар кыттаннар, кыайыылаахтар бириис ылан үөрдүлэр-көттүлэр. Талааннаах ырыаһыттар Зоя Михалева, Анна Алексеева, Елизавета Большакова, Төхтүртэн кэлбит ыалдьыппыт Тэтим Васильев дьон сүргэтин көтөхтүлэр. Киирии билиэтинэн бааттаах дьон сыаналаах бириистэри сүүйэн олус соһуйдулар, астыннылар.
Ыалдьыттар: «Өктөмнөр олус сэргэх, дьону умсугутар тэрээһини тэрийбиккитигэр ис сүрэхтэн махтанабыт. Өссө да атын кэлиэхпит»- диэн санааларын эттилэр.
Биэчэргэ кыттыбыт олохтоохторбутугар уонна ыалдьыттарбытыгар махтанан туран эйэлээх олоҕу, дьиэ кэргэҥҥитигэр бигэ туругу баҕара хаалабыт.
Федора Фомина.