1-кы Дьөппөн санаторнай оскуолатыгар СӨ бастакы президенэ Михаил Ефимович Николаевка анаммыт саахымат, дуобат күрэҕэр 5 хамаанда күөн көрүстэ. Хас биирдии хамаандаҕа учуутал, иитээччи, кылаастан икки үөрэнээччи кытыннылар.
Тыҥааһыннаах, кытаанах киирсии кэнниттэн нуучча тылын учуутала Сардаана Афанасьевна Борисова хамандыырдаах 8-с кылаас хамаандата бастаата. Богдан Рахматулин биир да хотторууну билбэтэ. 2 миэстэ иитээччи Наталья Дмитриевна Яковлева салалтатынан 9 кылаас үөрэнээччилэрэ Эльдар Прокопьев, Игнат Докторов буоллулар. 3 миэстэҕэ тиксэн английскай тылын учуутала Айсена Афанасьевна Титова, 6 кылаас үөрэнээччилэрэ Айсаар Негтягаев, Мирослава Сотрудникова үөрүү өрөгөйүн биллилэр.
Интеллектуальнай оонньуулар куруһуогун салайар мындыр, талба талааннаах Татьяна Ивановна Борисова этэринэн, саахымат, дуобат оҕо үөрэҕи ылыныытыгар, киһи быһыытынан иитиллэн тахсыытыгар, иллэҥ кэмин туһалаахтык атаарарыгар көмөлөөх. Маны таһынан оҕо өйүгэр иҥэриниитэ, оҥорон көрүүтэ, өйгө тутуута, болҕомтото, өйдүүр дьоҕура оонньуунан сайдар. Үөрэнээччилэр интэриэһиргээн, турунан туран кииристилэр диэн кини үөрэ кэпсээтэ. Күрэхтэһии кылаабынай судьуйатынан Афанасий Ильич Скрябин үлэлээтэ.
Анастасия Мордовская, 1-кы Дьөппөн санаторнай оскуола-интэринээтин иитээччитэ.