Сиинэбит кулуубун сыанатыгар ырыа-тойук, үҥкүү-битии кэһиилээх Чкалов олохтоохторо кэлэн ыалдьыттаатылар.
Таҥара сатыылаабыт дойдута диэн кинигэҕэ ахтыллан ойууламмытынан «Чкалов дэриэбинэтэ эргиччи лиҥкинэспит үрдүк харыйа мастарынан төгүрүллэн, илин өттүлэринэн Өлүөнэ эбэлэрэ ыраас уутунан сүүрүгүрэ устан, көмүс кумах биэрэгинэн күлүмүрдүү оонньоон, ханнык да улахан куораттар сынньанан, сөтүөлуур сирдэринээҕэр быдан ордук айылҕалаах, ханна да үүммэт сир аһын арааһа үүнэр, талах мастардаах, сибэкки кэрэтэ үүнэр кырдаллардаах, күөх от таптаан үүнэр хонуулардаах кэрэ сир». Дьэ мантан олохтоохтор үлэ үөһүгэр сылдьан быыс булан кэлэн сэргэхсиппиттэригэр махтал тылын этэбит!
Чкаловтан манна Сиинэҕэ кэлэн олохсуйбут эдьийдээтэр эдьийдэрэ олороллор — Аҕа дойду улуу сэриитин кыттыылааҕа, байанайдаах булчут, В.И. Ксенофонтов оҕонньор кыһыл көмүс чаһытынан оонньоон ааспыт кэрэ түгэннэрдээх Амбросьев Лэгиэнтэй оҕонньор кыыһа, 87 саастаах Амбросьева Клавдия Иннокентьевна манна олохсуйбута 57 сыл буолла. 1957-1959 сылларга Сиинэ оскуолатыгар үөрэммитэ.
Элбэх оҕо эбээтэ, хос эбээтэ, 86 саастаах Леверьева Мария Николаевна Сиинэҕэ сүктэн кэлэн олорбута 67 сыл буолла.
Мин эмиэ Чкаловка төрөөн-үөскээн улааппытым, Сиинэҕэ кийиит буолан кэлэн олохсуйбутум номнуо 39 сыл буолбут эбит. Дойдубут дьоно кэлбиттэригэр наһаа үөрдүбүт. Элбэх кинигэлэри таһааран дьоммут олорон ааспыт олохторун үйэтиппиккитигэр, киэҥ ис хоһоонноох баай түмэли оҥорон дьоҥҥо-сэргэҕэ, кэлэр ыччаттарга үтүө өйдөбүл хаалларбыккытыгар чкаловтарга махтанабыт. Өссө да саҥаттан саҥа хайысханы тобулан үлэлии, айа-тута сылдьаргытыттан, кыракый дэриэбинэбит үүнэ-сайда, дьон-сэргэ уутуйан олохсуйар дойдута буолбутуттан үөрэбит.
Олус истиҥ көрсүһүү буолла. Сиинэ «Дьүрүһүй» ырыа-үҥкүү ансаамбылын кыргыттара ас астаан аҕалан, илии тутуурдаах кэлэн ыалдьыттары көрүстүлэр. Оттон биһиги, көрөөччүлэр, «Аныгыскы көрсүөххэ дылы» дии хааллыбыт!
Лариса Леверьева, Сиинэ с.