Тиит Эбэ олохтоохторо, эдэр дьон Вера уонна Спиридон Яндреевтар сүөһү иитиитинэн дьарыктаналлар, хаһаайыстыбалаахтар. Үрдэ суулла турар хотонноохтор. Ол иһин, санаам буолбакка, аҕыйах хонуктааҕыта эмиэ кинилэргэ таарыйан аастым. Хаһаайыттар бэйэлэрэ олус кыһалҕалаах, «уһаабыт» бырыайыактарын билсэ Дьокуускай куоракка барбыттар, онон хаһаайыстыба тутаах киһитин, ыанньыксыт Екатерина Петрованы көрүстүм. Күн бүгүн Яндреевтар 51 ынахтарыттан 40 төбө төрөөбүт.
— Кэргэмминээн Дьөгүөрдүүн иккиэн манна ыанньыксыттыыбыт. Билигин маассабай төрүөх кэмэ, түбүк элбэх. Үлэбит үчүгэй буолан баран, хотоммут олус эргэтэ бэрт, сууллаары турар. Аны кыһын хайдах да кыстыыр кыах суох. Саҥа, аныгылыы хотон баара буоллар үөрэ-көтө үлэлиэ этибит. Ынахтарбыт төрөөн бүтэн эрэллэр. Быйылгы ньирэйдэрбит үксэ тыһылар, онон сүөһү төбөтө элбиир. Кыстыгы туоруур үчүгэй хаачыстыбалаах оттоохпут. Бүгүн өссө биир ынахпыт, тыһылаах атыыр игирэ ньирэйдэри төрөөтө. Эдэр ыаллары өйөөн хотон туталлара буоллар. Бу турар хотоммут сир харатыгар дылы сууллубакка турдар ханнык диэн баҕа санаалаахпыт, — диэтэ туруу үлэһит Екатерина Петрова.
Яндреевтар 2021 сыллаахха «Агростартап» тыа хаһаайыстыбатын граныгар кыттан уонна Хаҥалас улууһун дьаһалтатын субсидиятын ылан хаһаайыстыба тэриммиттэрэ. Аан бастаан түөрт ынахтан саҕалаабыттар, билигин 134 төбө сүөһүнү кыстатан тураллар. Маннык ситиһии үгүс үлэттэн кэлэр. Билигин Вералаах Спиридон инники сыаллара–соруктара биир — саҥа хотон туттуу.
Уйбаан УЙГУУРАП,
хаартыскаҕа: ыанньыксыт Екатерина Петрова