Соторутааҕыта Улахан Ааҥҥа С.А. Григорьев аатынан «Аан Аартык» Култуура киинин иһинэн үлэлиир «Көмүлүөк» түмсүү кыттыылаахтара 15 сыл устата үлэлээн-хамсаан кэлбиттэрин нэһилиэктэрин дьонугар-сэргэтигэр отчуоттуур тэрээһиннэрэ буолан ааспыта. Ол тэрээһиҥҥэ П.А.Ойуунускай аатынан Саха драматическай театрын дириэктэрин, биир дойдулаахтарын Петр Макаровы ыҥырбыттара бириэмэ булан кэлбэтэҕэ, ол оннугар, түмсүүгэ сылдьар эбээлэри барыларын театрга босхо испэктээкилгэ сырытыннартыам диэн илдьиттээбитин толорон, сэтинньи 24 күнүгэр театр автобуһун анаан-минээн ыытан, саха норуодунай суруйааччыта Василий Яковлев-Далан суруйбут сэһэнигэр туруоруллубут «Тулаайах оҕо» испэктээкилгэ биир дойдулаахтарын сырытыннарда, бэртээхэй сынньалаҥы тэрийдэ. Онон «көмүлүөктэр» үөрэн-көтөн туран Петр Тимофеевичка махталлара улахан, инникитин да үлэтигэр ситиһиилэри баҕараллар.
Бэлиэтээн эттэххэ, бу түмсүүгэ Петр Макаров икки кылаас салайааччыта бааллар: түмсүү салайааччыта, 1-4 кылааска диэри үөрэппит учуутала Вера Алексеевна Македонова, 4-10 кылааска диэри кылаас салайааччытынан үлэлээбит Зоя Афанасьевна Кононова. Үөрэппит оҕолоро ытыктыыр учууталларын Педагог уонна аҕа уһуйааччы сылынан эҕэрдэлээн театрга ыҥыртаан бэйэтэ сүрүн геройу оонньуур испэктээкилигэр ыалдьыттаппыта олус кэрэхсэбиллээх.
Римма Черемкина, С.А. Григорьев аат. «Аан Аартык» КК түмсүүлэрин салайааччыта.