Тиит Эбэҕэ «Кэскил» уһуйаан бэлэмнэнии бөлөҕүн кэрэ-нарын кыргыттара «Кэскилээнэ Куо-2024» күрэххэ бэйэлэрин кыахтарын, талааннарын, дьоҕурдарын көрдөрдүлэр.
Дьүллүүр сүбэҕэ уһуйаан сэбиэдиссэйэ Юриянна Трофимова, М.С. Атласов аатынан «Сарыал» Култуура киинин сэбиэдиссэйэ Мария
Михайлова, П.С. Скрябин аатынан 1-кы Дьөппөн орто оскуолатын алын кылаас учуутала Айта Сивцева үлэлээтилэр. Тэрээһини уһуйаан иитээччилэрэ Марина Алексеева, Наталья Скороходкина ыыттылар.
Күрэххэ кыттыбыт биэс кыыс бастакы түһүмэххэ бэйэлэрин билиһиннэрдилэр. Сиртэн сэрбэйиэхтэриттэн симээн улаатыннарбыт, сибэкки кэриэтэ кыргыттарбыт талба талааннарын көрдөрдүлэр. Аделина Герасимова аҕатынаан Платон Николаевичтыын «Цифровой цирк» ырыа бэлэхтээтилэр. Сайаана Сыромятникова «Ковбойскай үҥкүү» толоро тахсыбытыгар залга олорор, сүүрэ-көтө сылдьыбыт оҕолор бука бары үҥкүүлүү ойдулар. Нап-нарын кыысчаан бу үҥкүүтүнэн көрөөччүлэр биһирэбиллэрин ылыан ылла. Милана Иванова «Якутяночка» үҥкүүтүн ыраас күннүү күлүмнээн, лыахтыы дайан, мичилийэн толордо. Хотугу музыка алыптаах дорҕоонунан хомуска оонньоото Аэлита Тарасова. Мичилийэр мичээрдээх имигэстик хамсанар, үҥкүүлүүрүн сөбүлүүр Владислава Борисова спортивнай үҥкүү бэлэх уунна.
Үһүс түһүмэххэ кыттааччылар араас малтан, матырыйаалтан, кумааҕыттан ийэлэрин кытта уран тарбахтарынан оҥорбут авангарднай муоданы көрдөрдүлэр. Ийэлэр талааннарын, фантазияларын сөҕө-махтайа көрдүбүт.
Куонкурус бүтэһигэр кэрэчээн кыргыттар тапталлаах, дурда-хахха аҕаларын кытта вальстаатылар.
Уопсай түмүгүнэн Сайаана Сыромятникова «Сааскылаана Куо», Аэлита Тарасова «Мичийээнэ Куо», Аделина Герасимова «Сандаара Куо», Владислава Борисова «Кэрэчээнэ Куо» ааты ыллылар уонна «Кэскилээнэ Куо-2024» Милана Иванова эрэллээхтик буолла.
Маннык кэрэ сынньалаҥы бэлэхтээбит «Кэскил» уһуйаан үлэһиттэригэр махтанабыт!
Анастасия Мордовская, общественнай кэриспэдьиэн, Тиит Эбэ с.