СӨ Бастакы президенэ Михаил Ефимович Николаев төрөөбүтэ 87 сылыгар анаммыт “Кэрэни, сырдыгы саҕан” тэрээһин Төхтүр нэһилиэгин олохтоохторо, депутаттара, тэрилтэлэрэ, үөрэнээччилэрэ кыттыылаах үс түһүмэҕинэн ыытылынна.
Күн бастакы аҥарыгар А.Д. Широких аатынан Төхтүр орто оскуолатыгар үөрүүлээх быһыыга-майгыга ытык киһибит ыллыктаах олоҕун суолун, сыралаах үлэтин сырдатар, норуотугар туһуламмыт кынаттаах тыллара суруллубут стендэ арыллыыта буолла. Стендэни арыйар чиэскэ РФ үөрэхтээһинин Бочуоттаах үлэһитэ, СӨ үөрэҕириитин туйгуна, Учууталлар учууталлара, нэһилиэк депутаттарын сэбиэтин бэрэссэдээтэлэ Елена Соломонова уонна Төхтүр орто оскуолатын үөрэнээччитэ Айаал Корякин тигистилэр. Бу күн М.Е. Николаевка аналлаах кинигэ быыстапката оскуолаҕа уонна култуура дьиэтигэр модельнай бибилэтиэкэ көҕүлээһининэн тэрилиннэ.
Күн иккис аҥарыгар А.И. Борисов аатынан «Эркээни” Култуура киинигэр ааспыт тэрээһиҥҥэ нэһилиэк баһылыга Багдарыын Ньургун уола Кэскил кэнчээри ыччаттарга туһаайан Михаил Николаев ийэтэ Төхтүр сириттэн төрүттээҕин эттэ, ону чинчийэн үөрэтэргэ оскуола учууталларыгар, үөрэнээччилэригэр сорук туруорда. Бастакы президент туһунан киинэни көрдөрүү кэнниттэн «Рисуем все”, “Шахматы для всех” бырайыактарынан күрэхтэһиилэр, “Саха Бастакы президенэ” өркөн өй оонньуута буолла. Уруһуй күрэҕэр барыта 25 оҕо кытынна, бастыҥнарынан Карнелия Корнилова, Анжела Герасимова, Андрей Семенов ааттаннылар. “Кэскиллээх уруһуйдьут” анал аат 1-кы кылаас үөрэнээччитигэр Сайнаара Поповаҕа туттарылынна.
Дьиэ кэргэнинэн дуобат күрэҕэр Иван Устинов сиэнинээн Денистиин бастаатылар, иккис миэстэ Юрий Кузьмин кыыһынаан Никалыын буоллулар уонна үһүс миэстэҕэ Марина Алексеева уола Тимурдуун тигистилэр. “Кыайыыга дьулуур” анал аат Колесовтар дьиэ кэргэттэригэр туттарылынна.
Өркөн өй оонньуутугар уопсайа 4 хамаанда — А.Д. Широких аатынан орто оскуола учууталлара, үөрэнээччилэрэ, олохтоох дьаһалта уонна “Кэнчээри” оҕо уһуйаанын үлэһиттэрэ кытыннылар. Нэһилиэк модельнай бибилэтиэкэтин бибилэтиэкэрэ Елена Герасимова таҥан оҥорбут биэс түһүмэхтээх оонньуутугар уопсай баалынан Төхтүр орто оскуолатын хамаандата бастакы, олохтоох дьаһалта иккис, уһуйаан үлэһиттэрин хамаандата үһүс миэстэ буоллулар. Кыттааччыларга Туоһу суруктар, анал мэтээллэр туттарылыннылар.
Сахалар киэн туттар киһибит, Хаҥалас сириттэн тахсыбыт биир дойдулаахпыт Михаил Ефимович Николаев сырдык аата умнуллубатын, норуотугар хаалларбыт сүдү баайын суолтата сүппэтин, үйэлэргэ кынат буолан үрдүккэ дабаттын!
Дария Захарова, Төхтүр с.