«Көтөбүн, үүтээммэр хотойдуу…»

Аҕа Дойдуну көмүскээччилэр күннэрин чэрчитинэн Үөдэйгэ «Вечерка» култуура киинигэр «Көтөбүн, үүтээммэр хотойдуу…» диэн сүрэхтэммит тэрээһин бэрт сэргэхтик ыытылынна.

Күрэҕи А.Д. Макарова аатынан Дьокуускайдааҕы култуура уонна ускуустуба колледжын иккис куурсун устудьуона Иннокентий Филиппов сүрүннээн дьаһайан ыытта.

Күрэххэ уопсайа үс хамаанда кыттыыны ылла. Күрэх алта түһүмэхтэрэ булчут дьоҥҥо аналлаахтар. Быһаарсыылаах бүтэһик «Булчут суола» түһүмэххэ хамаандалар түөрт араас мэһэйдэрдээх эстафетаҕа кииристилэр.

Дьэ, бу курдук Үөдэйбит эр дьоно күрэхтэһэн эрбии тииһин курдук эр биир эрийистилэр, илин-кэлин түһүстүлэр. Түмүккэ «Сонордьут» хамаанда эрэллээхтик бастаан ордук бэлэмнээҕин көрдөрдө, иккис бочуоттаах миэстэҕэ «Хотойдор» хамаанда, үһүс бириистээх миэстэҕэ «Бэргэн» хамаанда таҕыстылар.
Ону таһынан үс көрүҥҥэ чаҕылхайдык кыттыбыт дьоҥҥо анал ааттар ананнылар: «Көрдөөх булчут»- Юрий Осиповка, «Бэргэн булчут»- Владимир Филипповка, «Өркөн өйдөөх булчут» — Алексей Филипповка.

Күрэх быыһыгар оскуола үөрэнээччилэрэ, уолан уолаттар бырааһынньыгынан эҕэрдэлээн ылбаҕай ырыалары ыллаатылар, хомоҕой хоһооннору аахтылар.

Сүрүн бириистэри олохтоох урбаанньыттар Виктор Асекритов, Игорь Ефремов, Яна Макарова, Сардаана Филиппова, IV-с Малдьаҕар нэһилиэгин булчуттарын уопсастыбата, «Вечерка» култуура киинэ, Алексей Филиппов туруордулар.
Нэһилиэк олохтоохторо бырааһынньыктааҕы тэрээһинтэн сэргэхсийэн, күрэх кыттааччылара сүргэлэрэ көтөҕүллэн тарҕастылар.

Евдокия Асекритова, Үөдэй с.