Истиҥ тылынан
Покровскайга, «Саргы түһүлгэтэ» култуура киинигэр общественнай- политическай деятель, СӨ V-с ыҥырыылаах Судаарыстыбаннай Мунньаҕын (Ил Түмэн) бэрэссэдээтэлин солб., РФ Хотугу сирдэрин, Сибиир уонна Уһук Илин табаһыттарын Ассоциациятын бэрэссэдээтэлэ, «Потомки государевых ямщиков» общественнай тэрилтэ салайааччыта, чулуу спортсмен Анатолий Добрянцев туһунан кинигэ сүрэхтэниитэ буолла.
Бу «Анатолий Добрянцев» диэн «Выдающиеся люди республики» сериянан тахсыбыт биир дойдулаахпытыгар анаммыт кинигэни билиһиннэрии саала толору ахта-саныы кэлбит дьонноох, курус эрээри сырдык тыыннаах дьоро киэһэҕэ кубулуйда.
Манна СӨ Ил Түмэнин бэрэссэдээтэлэ Алексей Еремеев, дьокутааппыт Афанасий Владимиров, СӨ физическай култуураҕа уонна спортка миниистирэ Леонид Спиридонов, «Потомки государевых ямщиков» общественнай тэрилтэ салайааччыта Ирина Стрекаловская, кини солб. Василий Кулагин, Анатолий Добрянцев төрөөбүт дойдутуттан, 5-с Малдьаҕар нэһилиэгин баһылыга Николай Осипов о.д.а. истиҥ ахтыы тыллаах эҕэрдэлэрэ байаан, хормуоска ырыанан, үҥкүүнэн, частушканан доҕуһуолланан ытыктыыр киһибитин санатта.
Хаҥалас патриотун, чулуу спортсменын, дьиҥнээх норуот туһугар үлэлии сылдьыбыт дьокутаатын кылгас эрээри дьоһун олоҕо, үлэтэ бу киэһэ ахтылынна, үрдүктүк сыаналанна. Анатолий Добрянцев норуокка туһалаах үгүс сокуоннары таһаарыыга дьаныардаах үлэтин, ону таһынан умнулла сыспыт дьаам дьонун үгэстэрин, култууратын бүтүн Россия таһымыгар хамсааһыҥҥа таһаарбытын, историятыгар сэргэхсийиини аҕалбытын ахтан аһардылар.
Ахтыы тэрээһинин улууспут «Хаҥаласчаан» оҕо үҥкүү ансаамбыла, Дьокуускайтан «Ямские бубенцы», Покровскайтан «Ямщицкий перезвон» ырыа фольклорнай ансаамбыллара, Тойон Арыыттан хормуоскаһыт Валерий Варфоломеев о.д.а. үҥкүүнэн, ырыанан, музыканан киэргэттилэр.
Киһи ахтылларын тухары тыыннаах диэн бэлиэ этии баар. Биир дойдулаахпыт Анатолий Добрянцев олорон ааспыт олоҕо үүнэр ыччаппытыгар үтүө холобур буолан умнуллуо суоҕа. Сүүрбэ икки сыл ыытыллан кэлбит «Играй, гармонь, живи, частушка!» Өрөспүүбүлүкэтээҕи фестиваль кини аатын сүгэр. Чулуу спортсмеммыт тэрийэн ыыта сылдьыбыт атах оонньууларыгар күрэхтэһиитэ салгыы ыытыллыа, төрөөбүт Кытыл Дьуратын Култууратын дьиэтэ кини аатын сүгэ туруо.
Людмила Аммосова.