Бэлиэ түгэн
Алтынньы 4 күнүгэр СӨ Ил Дархана Айсен Николаев видеоконференцсибээһинэн 19 улууска барыта 40 киинэ саалатын арыйда. Бу күн Хаҥалас улууһун түөрт нэһилиэгэр — Нөмүгүгэ, Хачыкаакка, Улахан Ааҥҥа уонна Төхтүргэ «Экстра Синема» технологиятынан киинэни улахан форматтаах экраҥҥа көрөр кыахтаннылар.
Төхтүргэ киинэ саалатын арыллыыта «Эркээни» Култуура-спорт киинигэр үөрүүлээх быһыыга-майгыга тэрилиннэ. Манна СӨ Бырабыыталыстыбатын бэрэссэдээтэлин солбуйааччы Анатолий Семёнов, «Экстра Синема» платформа генеральнай дириэктэрэ Петр Чиряев кытыннылар. Видеосибээһинэн эҕэрдэ тылы өрөспүүбүлүкэбит баһылыга Айсен Николаев, Сувереннай технология Фондатын салайааччы дириэктэрэ Арсений Розинский эттилэр.
«Маннык киинэ саалаларын кыра нэһилиэктэргэ арыйарбыт өрөспүүбүлүкэҕэ киинэ индустриятын сайыннарыыга биир дьоһун хардыы буолар. «Экстра Синема» российскай оҥоһуулаах киинэ проектордарын туһанар. Онон хаачыстыбалаах саҥа тахсар киинэлэри барытын Сахабытсирин саамай уһук да сирдэригэр көрөр кыах баар буолла«, — диэн Айсен Николаев бэлиэтээтэ.
Анатолий Семёнов олохтоохтору сонун киинэ саалата баар буолбутунан эҕэрдэлээн туран, алтынньы 17 күнүгэр сүрэхтэниэхтээх «Триумф» киинэни төхтүрдэр анал киэҥ форматтаах экраҥҥа көрүөхтэрэ диэн эрэннэрдэ.
Петр Чиряев 800 нэһилиэнньэлээх Төхтүр өрөспүүбүлүкэҕэ саамай кинематографичнай сэлиэнньэ буолар, чуолаан манна хас эмэ сахалыы киинэ уһуллубутун олохтоохтор кыттыбыттарын санатта.
Олохтоохтор сонун саҕалааһынтан долгуйа үөрдүлэр, бу күн сааланы толору мустан режиссёр Михаил Лукачевскай «Кыталыктаах кырдалым» киинэтин сэргии көрдүлэр.
Анастасия Перловская, Төхтүр олохтооҕо:
— Сэбиэскэй кэмҥэ кулуупка улаханныын-кыралыын киинэ көрөр буоларбыт. Билигин оннук кыах иккистээн эргиллэн, сөргүтүллэн үөрүүбүт муҥура суох. Саҥа киинэ саалатыгар дьон сылдьыа, оҕолорбут да саҥа тахсар киинэлэри бастакынан көрүөхтэрэ дии саныыбын. Тыа сиригэр маннык арыллыбыта олус үчүгэй.
Надежда Егорова, Нөмүгү олохтооҕо:
— Киинэ саалата арыллара нэһилиэнньэҕэ наадалаах. Урут саҥа киинэлэри көрдөрөллөрүн кэтэһэр этибит. Билигин киинэ эмиэ иккис тыыннанна, дьон сэргээн сылдьар буолла. Сахалыы киинэлэр тахса тураллар, ону тыа дьоно Дьокуускайга, Покровскайга баран көрөр кыаҕа суох, онон нэһилиэк аайы олохтоох киинэ саалаларыгар баран көрөр, сынньанар кыахтаммыттара олус бэрт.
Бэлиэтээн эттэххэ, «Экстра Синема» ХЭТ бырайыага «Култуура» национальнай бырайыак чэрчитинэн 2022 сылтан үлэлиир. Анал кэмпилиэккэ сервердаах проектор, сыыппара платформа уонна киинэ аһаҕас проката киирсэр. Ааспыт сылга бу аппаратураны дойду Президенэ Владимир Путин көрөн баран 50 тыһ кыра нэһилиэнньэлээх аччыгый куораттары уонна сэлиэнньэлэри киинэ саалаларынан хааччыйарга сорудахтаабыта.
Ольга Гермогенова.