Сэтинньи 1 күнүгэр Нөмүгү нэһилиэгэр “Хомсомуол төлөннөөх уоттара” диэн “Түһүлгэ” култуура киинэ ыыппыт Комсомольскай хамсааhын тэриллибитэ 106 сылыгар аналлаах тэрээһиҥҥэ урукку комсомолецтар түмүстүлэр. Нэһилиэкпит пенсионердарын уонна бэтэрээннэрин сэбиэтин бэрэссэдээтэлэ, уруккута комсомол сэкирэтээрэ Надежда Егорова тэрээһини үөрүүлээхтик арыйда, урукку активистары бэлиэтээтэ, эдэр саас кэмнэрин санаата. Астаах-үөллээх остуол тула мустан олорон ирэ-хоро кэпсэтэн, аастыйбыт баттахтаах комсомолецтар тэбэнэттээх эдэр саастарын эргитэн ыллаан-туойан, оонньоон-көрүлээн бэртээхэй киэһэни атаардылар.
1979 сыллааҕы Ой орто оскуолатын выпускниктара, “Иэйии”, «Талба» ансаамбыллар кыттыылаахтара комсомол саҕанааҕы ырыалары ыллаатылар, Татьяна Громова оонньуу оонньотон дьону сэргэхситтэ. Пионер, комсомол саҕанааҕы ырыалар, речевкалар, хоһооннор, устаап уо.д.а. дьон өйүгэр-санаатыгар умнуллубакка хаалбыттара сөхтөрдө. Дьоро киэһэни Александр Уваровскай, Андриан Егоров, “Хомус” ВИА (сал. Яковлев П. П.) ылбаҕай ырыаларынан, Егор Поисеев хомуска оонньоон киэргэттилэр.
Улуу Ленин комсомолун 106 сылынан эдэр саас эрэллээх аргыстарыгар, кырдьыбат комсомол доҕотторго эҕэрдэ этэн туран кыттыыгыт иһин махталбытын тириэрдэбит.
Саргылана Маркова.