Бүгүн Кыайыы Знамятын аҕалар Нам улууһун дэлэгээссийэтин ытык Хаҥалас кыраныыссатыгар долгуйа, сүгүрүйэ көрүстүбүт.
Эҥсиэли хочотун Өрөгөй дуоҕалаах бөлөҕүн Нам улууһун баһылыгын бастакы солбуйааччыта Анатолий Павлов, байыаннай хамыһаар Владислав Васильев, бэтэрээннэр сүбэлэрин бэрэссэдээтэлэ Софья Кобякова арыаллаан аҕаллылар.
Долгутуулаах тэрээһин үс сэргэлээх «Хаҥалас» диэн суруктаах бэлиэбит аттыгар буолла.
Нам улууһун аҕа баһылыгын бастакы солбуйааччыта Анатолий Павлов Өрөгөй знамятын Эҥсиэли хочотун дьонун- сэргэтин эҕэрдэтин кытары Хаҥалас баһылыгын солбуйааччытыгар Юрий Никифоровка туттарда, киниттэн знаменоцецтар салгыы алгыстаах айаҥҥа турунарга ыллылар.
Юрий Никифоров бу Сахабыт сирин Аҕа баһылыга Айсен Николаев ахсынньы 28 күнүгэр саҕалаабыт акцията саха норуотуттан бастакы Сэбиэскэй Сойуус дьоруойа Федор Попов дойдутуттан турунан бары улуустары эргийэн Кыайыы күнүгэр киин куораппытыгар эргиллиэҕэ диэтэ. 1941-1945 сыллардааҕы Аҕа дойду Улуу сэриитигэр Кыайыы бүтүн норуоппут өстөөхтөрү утары хорсун сомоҕолоһуутун сүдү ситиһиитэ буолар диэтэ уонна саҥа көлүөнэ ыччаппытын иитиигэ улахан оруоллааҕын бэлиэтээн туран мустубут дьоҥҥо Или, Эйэни баҕарда.
Долгутуулаах тэрээһиҥҥэ биир дойдулаахпыт, физическэй култуураҕа уонна спортка миниистир Леонид Спиридонов кытынна, Кыайыыны аҕалбыт бэтэрээннэргэ сүгүрүйэн тыл маанытын анаата. Көрсүһүүгэ бэтэрээннэри кытары анал байыаннай дьайыы кыттыылаахтара сырыттылар.
… «Ураа!» хаһыы сытыы тыалы үүрэр, Кыайыы знамята кытыаста кыыһар! Салгыы Өрөгөй дуоҕата Покровскайга суолун тутар…
Манна бүгүн, «Саргы түһүлгэтэ» култуура киинигэр Россияҕа, Саха сиригэр Ийэ дойдуну көмүскээччилэр, онтон Хаҥаласка — Кыайыы уонна Эйэ сыллара aрылынна.
Өрөгөй дуоҕатын улуус баһылыгын эбээһинэһин толорооччу Василий Андреев Покровскай куорат салайааччытыгар Петр Гермогеновка туттарда. Үөрүүлээх тэрээһининэн мустубут дьону СӨ Бырабыыталыстыбатын бэрэссэдээтэлин солбуйааччы Анатолий Семенов истиҥник эҕэрдэлээтэ, ситиһиилэри баҕарда. Сонун театрализованнай көрдөрүү Бырабыыталыстыба Хаҥаласка түмүктүүр отчуотун иннинэ дьон болҕомтотун тарта.
Людмила Аммосова суруйуута, хаартыскаҕа түһэриитэ, Наталья Григорьева видеота, хаартыската.