Төхтүр нэһилиэгин олохтоохторо А.И. Борисов аат. «Эркээни» Култуура киинигэр оскуола үөрэнээччилэрэ, тэрилтэ үлэһиттэрэ, общественность уонна сэрии кэмин оҕолоро буолан Улуу Кыайыы Знамятын өрөгөй ырыа доҕуһуоллаах көрүстүбүт.
Знамяны ыаллыы олорор Өктөм нэһилиэгин баһылыга Александр Большаков уонна улуус дьаһалтатын ыччаты кытта үлэҕэ испэсэлииһэ Ньургун Кононов аҕалбыттарын баһылыкпыт Кэскил Багдарыын уонна анал байыаннай дьайыы кыттыылааҕа Альберт Иванов
туттулар.
Үөрүүлээх түгэҥҥэ баһылык Кэскил Багдарыын, тыыл бэтэрээнэ, Төхтүр нэһилиэгин уонна Хаҥалас улууһун Бочуоттаах олохтооҕо Семен Петрович Заморщиков ыччат дьоҥҥо анаан тыл эттилэр. Байыаннай дьайыыга сылдьыбыт Альберт Иванов Ийэ дойдуга бэриниилээх, төрөөбүт дойду көмүскэлигэр өрүү бэлэм буолар туһунан этиитэ мустубут дьону долгутта.
Оскуола кэлэктиибин күүстээх аҥардара хоһоон аахтылар уонна «Сэрии буолбатын» диэн ырыаны саала иһин толору ыллаан доргуттулар. Тэрээһини үөрэнээччилэр флешмобтаан түмүктээтилэр.
Мотрена Ефремова, Төхтүр с.