Бүгүн, олунньу 9 күнүгэр, Хаҥалас улууһун 2-с Малдьаҕар нэһилиэгэр Тиит Арыы нэһилиэгиттэн Кыайыы Знамята кэллэ. Бу күн бары гимн истэн, сэрии толоонугар охтубут буойуттарбытын кэриэстээн, биир мүнүүтэлээх тохтобул оҥорон, Кыайыыбыт Знамятын үөрэн-көтөн көрүстүбүт. «Көмүлүөк» түмсүү эбээлэрэ бары алаадьы астаан аҕалан күндүлээтилэр.
Аҕа дойду сэриитэ хас биирдии ыалга өлүүнү-сүтүүнү, аччыктааһыны, тиийиммэт-түгэммэт буолууну аҕалбыта. Төһөлөөх элбэх оҕо сэрии ыар тыынын тулуйбакка, кыра саастарыгар күн сириттэн күрэммиттэрэ, ийэ-аҕа тапталын билбэккэ, тулаайах оҕо сорун-муҥун билбиттэрэ буолуой? Биһиги нэһилиэкпитигэр сэрии ыар сылларыгар ийэлээх-аҕатын сүтэрэн, төгүрүк тулаайах хаалан, аччыктааһыны, тоҥууну-хатыыны толору билбит сэрии сылын оҕото Мордосова Татьяна Гаврильевна олорор. Кини Кыайыы Знамятын кэлиитигэр ыҥырыылаах ыалдьыт быһыытынан кэлэн, көхтөөх кыттыыны ылла. «Бу тэрээһин олус үчүгэйдик ааста, Кыайыы былааҕын бары көрүстүбүт. Хас биирдии тыл эппит киһини истэн олордум. Уонна Кыайыы 80 сылын күнүгэр кэлэн кыттыыны ылыам дии саныыбын. Бэйэм 90 саастаахпын. Онон Кыайыы Знамятын үчүгэйдик көрдүбүт.
Оҕолорго сүбэлиэм этэ — үчүгэй үөрэҕи, дьиссипилиинэни. Бүгүн кэлэн истибит оҕолор Кыайыы күнүн хайдах көрсүбүттэрин барытын санаатыннар үйэлэрин тухары».
Биһиги нэһилиэккэ үтүө санаалаах волонтердар элбэхтэр. Кинилэри салайан үлэлэтэ сылдьар киһинэн Степанова Валентина Петровна буолар. Кини салайыытынан элбэх үлэ ыытыллан, анал дьайыыга араас оҥоһуктары көмөлөөн оҥорон, тохтоло суох ыыта олороллор.
— Валентина Петровна, Кыайыы Знамятын көрсүү тэрээһинэ хайдах ааста дии саныыгыный?
— Саамай үөрүүлэҕэ диэн — бэтэрээннэрбит кэлбиттэрэ буолар. Ол олус үчүгэй, астынным, дьон сүргэтэ көтөҕүллэн, байыаннай ырыа ылланан, Кыайыы Знамятын билигин аны Булгунньахтаахха илдьэллэр.
— Оҕолорго тугу сүбэлиэ этигиний?
— Үүнэр көлүөнэлэргэ, улаатан иһэр оҕолорго Ийэ дойдуларыгар бэриниилээх буолалларыгар баҕарабын. Саамай сүрүнэ — туруоруммут сыалларын ситистиннэр уонна хаһан баҕарар инникигэ эрэллээх буоллуннар.
Слепцов Богдан, 7 кылаас үөрэнээччитэ:
— Бүгүн биһиги Кыайыы Знамятын арыаллаан киллэриигэ кытынныбыт. Тэрээһин устата сыанаҕа турдубут. Долгутуулаах буолла. Хас биирдии тыл этэр киһи тугу этэллэрин болҕойон иһиттибит. Бары олус үчүгэйдик тыл эттилэр.
Нарыйана Матвеева, М. Е. Васильева аат. 2-с Малдьаҕар орто оскуолатын 11 кылаас үөрэнээччитэ.
Алина Григорьева, 11 кылаас үөрэнээччитин хаартыскаҕа түһэриитэ. Медиакиин.