#Оҕолорбут суруйаллар

Үөрүүлээх сонун нэһилиэкпит үрдүнэн тилийэ көттө. Ол курдук оскуолабыт спортсменнара Улахан Аан оскуолатыгар ыытыллыбыт улуустааҕы волейбол күрэҕэр кыайан-хотон эргилиннилэр. Онон оскуолабытыгар өссө биир кыайыы эбиллэн барыбытын үөртэ.

Мин бииргэ үөрэнэр уолбунаан Андрей Дягилевтыын  күрэхтэһии туһунан кэпсэттим. «Биһиги бу күрэххэ кыһыҥҥыттан күүстээхтик бэлэмнэммиппит, онон бэлэмнээх этибит. Сүүмэрдэммит хамаандаҕа 10 кылаастан Николаев Никита, 9 кылаастан Иванов Эрчим, Дьячковскай Айтал, Козловскай Коля, Дягилев Дима, Ефремов Марат 8-с уонна мин 7-с кылаастан баарбыт. «Улахан Аан спортивнай саалата киэҥ-куоҥ эбит. Киһи сүүрэригэр-көтөрүгэр, хамсанарга, дьарыктанарга сөптөөх усулуобуйалаах эбит дии санаатым. Биһиги аҕыс оскуола хамаандатыттан бастааммыт үөрүүбүт олус улахан! Тиит Арыы, Улахан Аан, Өктөм, Покровскай о.д.а. оскуолалар бааллара, бары да күүстээх хамаандалар. Ол эрээри биһиги хара ааныттан биир да очукуону биэрбэккэбит ситиһиилээхтик оонньоотубут. Хапытааммыт Иванов Эрчим сөптөөх түгэннэри аһарбакка көмөлөһөн, ыйан-кэрдэн биэрэр дьоҕурдаах. Учууталбыт Очиржап Баирович биһигини утумнаахтык, бары кыаҕын биэрэн туран эрчийбитин түмүгэр кыайыыны ситистибит», — диэн Андрей кэпсээнин түмүктээтэ.
Спортка ситиһиилээх доҕотторбут үөрэххэ эмиэ бу курдук инники сылдьыахтарыгар баҕарыаҕыҥ!

Айсена Борисова, 1-кы Дьөппөн орто оскуолатын 7 кылааһын үөрэнээччитэ, Медиакиин.