Покровскайга «Арчы дьиэтэ» норуот айымньытын киинигэр Күн Дьөһөгөй Айыыга сүгүрүйүү алгыһын СӨ култууратын үтүөлээх үлэһитэ, алгысчыт Лидия Харитонова толордо. Бу бэлиэ күн ыраахтан-чугастан мустубут дьон алгыстанан, арчыланан санааларын сааһыланнылар, ырааһыран чэбдигирдилэр.
Тэрээһин чэрчитинэн сылгы иитиитигэр, чуолаан, биэни ыаһыҥҥа тус уопутун сылгыһыт, кымысчыт, Өктөм нэһилиэгин олохтооҕо Марк Лиханов үллэһиннэ, биэ кымыһын туһатын туһунан, хаһаайыстыбатын үлэтин билиһиннэрдэ.
Марк Прокопьевич 2007 сылтан өрөспүүбүлүкэҕэ биэни ыан кымыс оҥорууну биир бастакынан сөргүппүт киһинэн биллэр. Кини хаһаайыстыбата оҥорон таһаарар кымыһа 2022, 2023, 2024 сылларга Туймаада ыһыаҕар Айыы аһын күрэҕэр кыайыылаах буолан турар.
— Билигин 78 төрүүр биэлээхпин, ыанааччыта — 35. Ыам ыйын ортотуттан биэни ыан саҕалыыбын. Сайынын 14-16 биэни автодойканан ыыбыт. Биир ыамҥа 2 киилэ курдук үүт ыаныллар. Холобура, 2 лиитэрэ биэ үүтүттэн 2,5 лиитэрэ кымыһы таһаарабын. Биэ үүтүн сыата бэрт кыра буолар – 0,3-0,5 эрэ. Улуус өйөбүлүнэн үүт аһы оҥорон таһаарар анал сыах туттаммыт биэ үүтүн, кыынньар кымыһы оҥорон атыылыыбыт. Үксэ сакааска үлэлиибит. Арай, дьэ бу соторутааҕыта, Дьокуускай куоракка баар «Эт-үүт» маҕаһыыҥҥа атыыга туттарар буоллум, — диэн хаһаайыстыба баһылыга кылгастык кэпсээтэ.
Бэлиэтээн эттэххэ, маннык бары ирдэбилгэ эппиэттиир сылгы ыыр сыах өрөспүүбүлүкэбитигэр соҕотох Өктөмҥө эрэ баар.
Бу күн ким баҕалаах Лихановтар оҥорон таһаарар уохтаах кымыстарын, сибиэһэйдии биэ үүтэ атыылаһан амсайдылар.
Ольга Гермогенова.