И.М.Яковлев аатынан Покровскай 1-кы №-дээх оскуолатыгар «Сахалыы тыыннаах ыччаты иитии — инники кэскилбит» улуустааҕы үөрэнээччилэр, учууталлар, дириэктэри солбуйааччылар түһүлгэлэрэ ыытылынна. Манна ыалдьыттарынан Өрөспүүбүлүкэтээҕи лиссиэй-интэринээт, улууспут оскуолаларын учууталлара, үөрэнээччилэрэ буоллулар. Бу тэрээһин сүрүн соруга –улууска саха тылын киэҥник тарҕатар соруктаах, сахалыы эйгэни үөскэтэр, сайыннарар, төрөөбүт тылбытын харыстыыр өрөспүүбүлүкэтээҕи «Күн» оҕо общественнай хамсааһынын тэрийии.
Тэрээһини көҕүлээбит оскуола дириэктэрэ Спиридон Шишигин эҕэрдэ тыл эттэ, хомуска оонньоон эҕэрдэлээтэ. Спиридон Спиридонович көрсүһүү үтүө түмүктээх буоларыгар эрэнэбин диэн туран Өрөспүүбүлүкэтээҕи лиссиэй-интэринээт учууталларыгар, үөрэнээччилэригэр махтанна. Улуус үөрэҕириитин начаалынньыгынан соторутааҕыта анаммыт Павел Аргунов төрөөбүт тылын билэр, илдьэ сылдьар эрэ норуот үйэлэри уҥуордаан баар буолар диэтэ уонна маннык хамсааһын улууспутугар тэриллэрэ чахчы наадалаах, баһылык Олег Иринеев улуус бары үөрэх тэрилтэлэригэр саха тылын үөрэтиини киллэрэргэ үлэ саҕаланыахтаах диэн быһаччы сорудахтаан турарын, салалта ону өйүүрүн эттэ. Өрөспүүбүлүкэтээҕи лиссиэй-интэринээт иитэр үлэҕэ дириэктэри солбуйааччы Клара Романова «Күн» оҕо общественнай хамсааһынын сыалын-соругун билиһиннэрдэ, маннык түмсүүлэри тэрийэр соруктаах илин эҥэр улуустарыгар сылдьыбыттарын, салгыы атын оройуоннары хабар сорук турарын кэпсээтэ.
Күн устата ыытыллыбыт тэрээһин бастакы аҥарыгар үөрэнээччилэр бэйэ-бэйэлэрин кытта билистилэр. Бэлиэтээн эттэххэ, манна хас биирдии оскуолаттан 8-11 кылаас саамай көхтөөх үөрэнээччилэрэ, лидер, бэйэлэрин саастыылаахтарын көҕүлүүр, төрөөбүт тыл сайдыытыгар туруулаһар оҕолор муһуннулар. Кинилэр төрөөбүт тылбыт сайдарын туһугар туох үлэ барыан сөбүн туһунан бэйэлэрин көрүүлэринэн, идеяларынан бырайыак оҥорон көмүскээтилэр.
Учууталлар үөрэнээччилэриттэн арахсан эмиэ туһунан үлэлээтилэр, төрөөбүт тылы үөрэх кыһаларыгар үөрэтии, саха тылын үйэтитии суолларын тобулар сыаллаах төгүрүк остуолга кытыннылар, араас сонун этиилэри иһитиннэрдилэр, тус уопуттарыттан көрүүлэри үллэһиннилэр. Билигин үгүс оҕо уһуйаан сааһыттан гаджет арыаллаах улаатар, интернет сабыдыала улаханын педагогтар бэлиэтээтилэр. Аны туран, саха оскуолатын үөрэнээччилэрэ нууччалыы-сахалыы буккуйан саҥаралларын, сахалыы ситимнээх саҥа быстар мөлтөҕүн, ол таба суруйууга эмиэ охсорун холобурдаатылар. Биллэн турар, оҕо оҕону көҕүлүүр түмсүүтэ баар буоларын өйүүллэрин, оҕо-төрөппүт- учуутал ситимнээх үлэни тэрийсэргэ бэлэмнэрин эттилэр.
Людмила Горохова, Покровскай 1-кы №-дээх оскуолатын саха тылын уонна литературатын учуутала:
— Тэрээһиҥҥэ араас нэһилиэк оскуолаларыттан барыта 76 үөрэнээччи, 21 педагог кытынна. Учууталлар төгүрүк остуолларын Өрөспүүбүүкэтээҕи лиссиэй иитэр үлэҕэ дириэктэри солбуйааччы Клара Романова салайан ыытта уонна “Күн”оҕо түмсүүтэ хайдах салайыллан үлэлиэхтээҕин туһунан сиһилии бэйэтин санаатын үллэһиннэ. Төгүрүк остуол кыттыылаахтара санааларын-көрүүлэрин этиннилэр, биир санаанан “Күн”диэн оҕо түмсүүтүн тэрийэргэ бэлэмнэрин биллэрдилэр.
Күн иккис аҥарыгар лиссиэй-интэринээт дириэктэрэ Иван Шамаев кэлэн оҕолору кытары көрүстэ, ол кэнниттэн оскуола бүттүүн кэлэктиибин, улуус саха тылын учууталларын кытары аһаҕас кэпсэтиигэ кытынна. Мустубут дьон Уйбаан Уйбаанабыс көрүүтүн, санаатынолус сэргээтилэр, махтаннылар. Хаҥалас улууһун үөрэҕириитин салалтатыттан бу аһаҕас кэпсэтиигэ иитэрүлэ салаатын испэсэлииһэ Галина Дмитриевна Никифорова кыттыыны ылла, “Күн” оҕо түмсүүтэ тэриллибитэ кэрэхсэбиллээх, саҥа сонун көрүү диэн бэйэтин этиитигэр бэлиэтээтэ.
Өрөспүүбүлүкэтээҕи лиссиэй-интэринээт көҕүлээһининэн уонна биһиги оскуолабыт тэрийбит тэрээһинэ сыалын-соругун ситтэ. Улууспутугар “Күн”оҕо түмсүүтүн тэрийэбит диэн ыра санаалаах, үөрүү-көтүү үктэллээх тарҕастыбыт тэрээһин бары кыттыылаахтара. Өрөспүүбүлүкэтээҕи лиссиэй-интэринээт кэлэктиибигэр махталбытын биллэрэбит, “Күн” оҕо түмсүүтэ күн курдук күлүмүрдээн, сулус буолан сырдыкка сыдьаайдын бүттүүн өрөспүүбүлүкэ үөрэнээччилэригэр. Түгэнинэн туһанан, бу тэрээһин тэриллиитигэр сүүрбүт-көппүт Покровскай 1-кы №-дээх оскуолатын дириэктэригэр Спиридон Шишигиҥҥэ, өйөбүл, көмө буолбут Хаҥалас улууһун үөрэҕириитин салалтатыгар махталбытын биллэрэбит улуус саха тылын учууталларын аатыттан, — диэн көрсүһүү тэрийээччилэриттэн биирдэстэрэ Людмила Моисеевна санаатын үллэһиннэ.
Онон, ийэ тылларын таптыыр оҕолор «Күн» түмсүүлэрэ Хаҥалас улууһугар баар буолла. Тэрээһин түмүгүнэн Покровскай 1-кы №-дээх оскуолатыттан араас кылаастартан барыта 28 оҕо түмсүүгэ киирдэ. «Күн» Хаҥаластааҕы салаатын Ой уонна Покровскай 1-кы №-дээх оскуолаларын учууталлара иилээн салайыахтара. Саха тылын харыстааһыҥҥа хамсааһын баар, үлэ тэриллиэ.
Ольга Гермогенова.