Өктөмнөөҕү норуот тыйаатыра Туймаада ыһыаҕар Е.С. Рожина «Күн көрүө, от үүнүө» музыкальнай испэктээҕин биир тыынынан үрдүк таһымнаахтык көрдөрөн кэллилэр.
Артыыстар бары да ырыаһыттара, үҥкүүһүттэрэ дьону сөхтөрдө. Билиҥҥи кэмҥэ саамай сөптөөх испэктээҕи туруорбуттар диэн дьон сыаналаата. Испэктээк көрөөччүлэр биһирэбиллэрин ылла, дохсун ытыс тыаһынан түмүктэннэ.
— Көрөөччүлэр олус астыннылар. Артыыстар да Туймаада ыһыаҕар кыттыбыттарыттан үөрүүлэрэ үгүс. Манна кэлэн кыттыбыппытыгар тыйаатыр артыыстарын, үҥкүүнү туруорааччы Надежда Черкашинаҕа уонна да атык күүс-көмө буолбут дьоҥҥо махтанабын, – диэн тыйаатыр режиссера, СӨ култууратын туйгуна Зоя Аржакова үөрүүтүн үллэстэр.
Өктөмнөөҕү норуот тыйаатырыгар салгыы бу курдук айымньылаахтык бэйэлэрин ааттарын элбэхтик ааттаталларыгар баҕарабыт. Маннык курдук көрөөччүлэр куттарын тутан салгыы саҥа туруоруулары таһаара турдуннар.
Татьяна Владимирова.