Хаҥалас улууһун үөрэнээччилэрэ аҕыс буоламмыт өрөспүүбүлүкэтээҕи лицей интэринээтигэр “Күн” оҕо түмсүүтүн сүрэхтэниитин тэрээһинигэр кыттыыны ыллыбыт.
Бу түмсүүнү туох санааттан тэриммиттэрин, хайдах тэринэн үлэлээбиттэрин, ханнык улуустарга сылдьыбыттарын, туох саҥа толкуй баарын лиссиэй үөрэнээччилэрэ кэпсээтилэр. Сүрэхтэнии киэһээтигэр суруйааччы Яна Байгожаева кытынна, лиссиэй-интэринээт дириэктэрэ Иван Иванович Шамаев этиилэрин сэргии иһиттибит.
Төгүрүк остуол тула санаа атастаһыытыгар салгыы үлэ хайдах барыахтааҕын, туох үлэ ыытыллыбытын ыҥырыылаах оскуолалар үөрэнээччилэрэ бэйэбит санаабытын, үлэбитин кэпсээтибит. Биһиги, Покровскай 1-кы №-дээх оскуола үөрэнээччилэрэ, нэдиэлэҕэ биирдэ мустаммыт сахалыы тэрээһиннэри ыытабыт, оҕолор көхтөөхтүк кытталларын ситиһэбит. Тэрээһиммитин кимтэн да тутулуга суох, “Күн” түмсүү оҕолоро бэйэбит былаанныыбыт. Маннык хайысханан үлэлиирбитин өрөспүүбүлүкэ үөрэнээччилэрэ сэргии иһиттилэр, хайҕаатылар.
Бу күн станциянан арахсан оонньоотубут, оһуокайдаатыбыт, бэйэ-бэйэбитин кытары чугастык билистибит. Бары биир толкуйдаах оҕолор мустаммыт бу дьоро түгэҥҥэ тылбыт сайдыытыгар, сүппэтин туһугар үлэлэһиэхтээхпит диэн андаҕар биэрдибит. Маннык тэрээһин ыытыллара хас биирдии оҕоҕо туһалаах, наадалаах, саастыылаахтарын саҥаларын, толкуйдарын истэн киһи элбэххэ үөрэнэр, саҥа сонун, араас толкуйдар киирэллэр. Тус бэйэм көрсүһүүттэн астынным, үөрдүм.
“Күн” оҕо тэрилтэтэ күн сылааһынан сыдьаайдын, сырдыкка сирдээтин, төрөөбүт Ийэ тылбытын таптааччы оҕолор элбии турдуннар! Андаҕар тылбыт олоххо киирэригэр үлэлэһиэхтээхпит диэн санааҕа, толкуйга кэллибит биһиги, Хаҥалас “Күн” оҕо тэрилтэтин үөрэнээччилэрэ.
Сайаана Еремеева, Покровскай 1-кы №-дээх орто оскуолатын 8-с кылааһын үөрэнээччитэ, “Ыллык” куруһуок чилиэнэ.