Уйгуну оҥорооччу
Илгэни биэрээччи
Ойуулаах от-мас төрдө
Хамсыыр харанай ийэтэ
Күн Иэйэхсит ийэ хотун
Бэттэх көр, мичик гын!
Саҥа дьыл иннинэ Хоточчуга Старос-тиннар дьиэ кэргэттэригэр үөрүүлээх түгэн үүнүө – үс игирэ уол оҕо көмүс ньээкэ уйатыгар аан бастаан киириэ. Бу уолаттар билигин төһө даҕаны кыракый буоллаллар, сотору кэминэн хааман тоотоҥнуохтара. Онтон билигин болҕомто ураты киинигэр сылдьаллар, көрүү-истии эрэйиллэр.
“Олеся уонна Николай икки кыргыттарыгар, икки уолаттарыгар үс кырачаан эбиллэр – Эльдар, Ренат, Прокопий. Ийэлэригэр улахаттар көмөлөһүөхтэрэ, аҕалара тыраахтарынан нэһилиэнньэҕэ араас өҥөнү оҥорон күн иллэҥэ суох. Ону таһынан Старостиннар сүөһү-ас туталлар. Түбүк үгүс ыала”, — диэн баһылыгы солбуйааччытынан үлэлии сылдьыбыт Тамара Яндреева кэпсээтэ. Олеся Михайловна оҕолонуон иннинэ оҕо уһуйааныгар иитээччинэн үлэлээбитэ, мантаныла борбуйдарын көтөҕүөхтэригэр дылы кырачааннарын көрүөҕэ. Старостиннарга үүнэр сылга дьол-соргу тосхойдун!
Людмила МОРДОВСКАЯ.