Улууспут соҕуруу нэһилиэктэриттэн биирдэстэригэр, Кытыл Дьураҕа, олохтоох дьаһалта көҕүлээһининэн бу күннэргэ кыһыҥҥы суолу баттаһа тутуу матырыйаалыгар тиийэ таһаҕас арааһа харыытаабакка тиийэ турар. Нэһилиэк баһылыга Николай Осипов түбүгүн быыһыгар кылгас иһитиннэрии оҥордо.
— Сааскы-сайыҥҥы ыйдарга нэһилиэкпит олоҕо сайдарын-тупсарын туһугар үлэ тэрээһиннээхтик барар. Бастатан туран, Олорор дьиэ-уот хомунаалынай хаһаайыстыбатын салаатынан инвестиционнай бырайыак чэрчитинэн 4,5 МВт кыамталаах хочуолунай тутуллар сылаас ситимин тыраассатыгар анаан «Олохтоох көҕүлээһиннэри өйүүр» бырагырааманан бүрүөһүннээх турбалары миэстэтигэр тиэртибит. Үлэ этэҥҥэ бардаҕына, нэһилиэгим олохтоохторо 80% сылааска сэтинньигэ холбонуохтара. Билигин сайыҥҥы күүстээх үлэҕэ бэлэмнэнии бара турар. Саас-күһүн суол быстарыктаах сиригэр олорорбутунан, «Саханефтегазсбыт» тэрилтэттэн анал иһиттээх 36 туонна уматык Кытыл Дьураҕа кэллэ. Тыа хаһаайыстыбатынан дьарыктанар, ынах-сылгы иитэр дьоммутугар «Тимин» ХЭТ чэпчэтиилээх эбиэһи, комбикорманы, зернофураһы аҕаллылар. Биир үтүө сонуммунан нэһилиэгим дьонун сайаапкаларынан Улахан Аантан дьиэ тутталларыгар, дьиэлэрин акылаатын уларыталларыгар диэн чэпчэки сыанаҕа тутуу матырыйаалын аҕалтардыбыт, этэргэ дылы, куорат сыанатынан. Биир сүрүн үөрүүбүт — «Центр энергоресурсосбережения и новых технологий РС (Я)» АУо энергосервиснэй хантараак баттаһаммыт, тымныы кулууппутун ититэн, таһыттан бүрүйтэрдибит, — диэн Николай Петрович үтүө сонуннарын кэпсээтэ.
Кытыл Дьура олохтоохторо олоххо көхтөөх дьон. Миэстэтигэр кэлбит таһаҕаһы бары саба түһэн сүөкээн дьаарыстыыллар. Бары биир киһи курдук үлэлииллэр.
Уйбаан Уйгуурап,
хаартыскалары уонна видеоны Николай Осипов тиксэрдэ.