Маннык ааттаах Хаҥалас улууһун хомуллубут хуорун үйэ чиэппэрдээх үбүлүөйдээх биэчэрэ сэтинньи 13 күнүгэр Покровскайга «Саргы түһүлгэтэ» култуура киинигэр бэрт сэргэхтик бэлиэтэннэ.
Саха өрөспүүбүлүкэтин Бастакы Президенэ, аан дойду таһымнаах судаарыстыбаннай, политическай диэйэтэл Михаил Николаев норуот сайдыытыгар, кэрэҕэ дьулуһуутугар култуураҕа, искусствоҕа улахан суолтаны биэрэрэ. 1999 сыллаахха Хаҥаласка бастакы үөрэх кыһата тэриллибитэ 125 сылыгар ыытыллыбыт тэрээһиҥҥэ сылдьан аан бастаан хуор толоруутугар суруйааччы Георгий Борисов тылларыгар, култуура туйгуна Михаил Атласов мелодиятыгар «Хаҥаластар буолабыт» диэн ырыаны долгуйан, үөрэн атаҕар туран истибитэ уонна бу айымньыны өрөгөй ырыатынан ылыныаҕыҥ диэн санаатын эппитэ. Ол кэмтэн бу ырыабыт үөрүүлээх дьоһун түгэннэрбитин арыаллаан кэллэ. Михаил Ефимовичпыт күн сирин көрбүт күнүгэр Хаҥаласпыт хуора 25 сыллаах үбүлүөйүн бэлиэтээбитэ онон улахан суолталаах.
Хаҥаластар сүүһүнэн киһилээх холбоһуктаах хуордара Эркээни ыһыаҕын арыйбыта кэпсэлгэ сылдьарын билэбит. Хуорбут билигин күөгэйэр күнүгэр — сайынна, репертуара кэҥээтэ. Ону бу үбүлүөйдээх кэнсиэрэ да бигэргэттэ.
Хаҥалас хуорун киэһэтэ кырачаан скрипачтар оонньууларынан арыллан Сахабыт сирин өрөгөй ырыатынан саҕаланна. Салгыы бииртэн биир айар кэлэктииптэр чочуллубут нүөмэрдэринэн ситэриллэн истэ — ырыа, үҥкүү, кырыымпа бөлөҕүн оонньуутунан солбуллан бэрт сэргэхтик ааста.
Бу киэһээ биһиги «Махтал Эйиэхэ, Бастакы Президэҥҥэ» ытыктанар ырыаны ньиргиччи толорбута ытык биир дойдулаахпытыгар сүгүрүйүү бэлиэтэ буолла.
Хуорбутун бу тухары Покровскайдааҕы искусство оскуолатын преподавателэ, СӨ култууратын туйгуна Людмила Артамонова ситиһиилээхтик салайан кэллэ. Махтал буоллун, ырыа куттаах энтузиаст киһиэхэ! Үгүстэрэ анал үөрэҕэ да суох буоллар араас идэлээх, үлэлээх ырыаны аргыс оҥостубут дьону бириэмэ булан түмэр, уонунан сыл арахсыбакка үлэлээн ситиһиилээх кэлэктиип гына үүннэрэр манан дьыала буолбатаҕа биллэр
Киһи кэрэхсиэҕэ — бу киэһээ урукку сылларга хуорга ыллыы сылдьыбыт бэтэрээннэр кэлбиттэрэ үөртэ.
Эҕэрдэ үтүөтэ кинилэргэ туһуламмыта олус бэрт. Бэтэрээн ырыаһыттарбытыгар Анна Федороваҕа, Альбина, Анатолий Харлампьевтарга, Фридрих, Валерий Федоровтарга, ырыаны, музыканы өрө туппут Егор Кампеевка, Гаврил Куприяновка, Виктор Григорьевка о.д.а. Хаҥалас ырыанан искусствотын үрдүк таһымҥа таһаарбыт дьонугар анаммыта сиэр-майгы быһыытынан иһилиннэ.
Аҕа көлүөнэни билигин эдэр дьон солбуйар. Олохпут тутула да уларыйдар, ырыаны туох да туора садьыйбат. Хуорбут сайдар, үүнэр — сүүһүнэн сыл ылланан кэлбит «Саха ырыатын» сэргэ «Эргис сирэ» диэн сонун айымньы тахсыбыта эмиэ үөрдэр. Эдэрдэр тахсаллар — Алена Слепцова, Анна Давыдова, кырыымпаһыт ыччаттар, скрипкаһыт оҕолор…
Үбүлүөйдээх тэрээһиҥҥэ улууспут, куораппыт дьаһалталарын салайааччылара Василий Андреев, Петр Гермогенов, култуура управлениетыттан Сергей Павлов, Ил Түмэҥҥэ дьокутааппыт Алиш Мамедов, Оройуоммут Мунньаҕар норуот талбыт дьоно Анатолий Антонов, Сергей Гребнев илии тутуурдаах, наҕараадалардаах кэлэн эҕэрдэлээн барбыттара тэрийэр үлэлэригэр махталларынан буолла. Сайда тур, Хаҥалас хуора!
Людмила Аммосова.
Ааптар хаартыскаҕа түһэриилэрэ.