Оҕолору сахалыы тылга-өскө, төрүт үгэһи үйэтитиитэ хайысхаланар, олоҥхоҕо кэрэхсэбили, болҕомтону тардар, көҕүлүүр сыаллаах «Олоҥхо — саха норуотун барҕа баайа» диэн ааттаах Малдьаҕар оскуолаларыгар аналлаах түһүлгэни Үөдэй орто оскуолата тэрийэн ыытта. Түһүлгэ түөрт хайысханан ыытылынна — «Олоҥхо уһулуччулаах чулуу айымньы» олоҥхоттон театрализованнай туруоруу , «Олоҥхо геройдара» илиинэн оҥоһук, » Олоҥхо оҕо хараҕынан» уруһуй күрэҕэ.
Бу күн V Малдьаҕар, Сиинэ орто оскуолалара ыалдьыттыы кэллилэр. Тэрээһин алгыс туомунан саҕаланна. Оскуола учууталлара Хомус күнүнэн хомус лыҥкынас тыаһынан санаабытын көтөхтүлэр. Тэрийээччи Үөдэй орто оскуолата «Үс үүт күрүөнү үрдүнэн көстөр үрүмэччи маҥан аттаах Үрүлү Бэргэн бухатыыр» олоҥхону, V Малдьаҕар орто оскуолата «Дьулуруйар Ньургун Боотур» олоҥхону, Сиинэ орто оскуолата «Күөнэ көҕөччөр аттаах күүстээх-уохтаах Күн Күндүлү бухатыыр» олоҥхону театр майгытынан туруордулар. Үс оскуола оҕолоро олоҥхо эйгэтигэр киирэн абааһы адьарай аймахтара буолан сарбаҥнастылар, аһыныылаах санаалаах айыы аймахтара буолан суугунастылар, көмүскэстээх санаалаах күн улуустара буолан күөгэлдьистилэр.
Олоҥхону туруоруу кэннэ «Олоҥхо кэрэ эйгэтэ» оонньуу түһүлгэтэ ыытылынна. Салайааччыларга анаан төгүрүк остуол тэрилиннэ. Олоҥхону туруорбут салайааччылар санааларын үллэһиннилэр, инникилэрин торумнаатылар. Түмүккэ олоҥхону туруорууга III үрдэлинэн V Малдьаҕар оскуолата (сал. Лотова Александра Анатольевна, Петрова Мира Николаевна), II үрдэлинэн Сиинэ оскуолата (сал Никодимова Аксиния Васильевна, Асекритова Саргылана Васильевна) уонна I үрдэлинэн 42 оҕону кытыннарбыт Үөдэй орто оскуолата (сал. Самсонова Туйаара Васильевна, Григорьева Ирина Николаевна, Филиппова Мария Витальевна) бэлиэтэннэ.
Олоҥхону толорууга, уобарастаан көрдөрүүгэ «Талба талаан» анал аат Каралина Поповаҕа (Үөдэй оскуолатын 4 кылааһын үөрэнээччитэ) ананна, «Ыллам ырыалаах толорооччу» Таня Тимофеева (V Малдьаҕар оскуолатын 10 кылааһын үөрэнээччитэ) буолла, «Хомоҕой хоһоонноох толорооччу» — Капитонова Дарияна (V Малдьаҕар оскуолатын 8 кылааһын үөрэнээччитэ) уонна «Кэскиллээх толорооччу» аатын Дима Осипов (Үөдэй оскуолатын 6 кылааһын үөрэнээччитэ), Турахова Диана ( Сиинэ оскуолатын 4 кылааһын үөрэнээччитэ) ыллылар.
Маны тэҥэ «Олоҥхо оҕо хараҕынан» уруүуй, «Олоҥхо геройдара» оҥоһук быыстапката түүүмэхтэр түмүктэннилэр. Дьоро күн оһуокайа дуорайда. Кэлбит ыалдьыттар түмсүүлээх оскуола кэлэктиибигэр махтанан тарҕастылар.
Туйаара Самсонова,
Үөдэй с.