1990 сыл бэс ыйын 15-17 күннэригэр Горнай оройуонун Бэрдьигэстээҕин үрдүнэн Манчаары Баһылай бирииһигэр XII спартакиада былааҕа көтөҕүллүбүтэ. Спартакиадаҕа барыта 17 оройуонтан 400 спортсмен кыттыбыта.
Оҕунан ытааччыларга уолаттарга Үргэл Кривогорницын 1160 очукуоланан барыларын ырааҕынан куоталаан бастаабыта, кыргыттарга Зинаида Васильева 1179 очукуоланан эрэллээхтик бастаабыта. Хамаанданан Горнай оройуонун охчуттара бастаабыттара.
Чэпчэки атлетикаҕа 10000 м сүүрүүгэ, эр дьоҥҥо Артур Феофанов, 5000 м Гаврил Нохтунскай (Чурапчы) пьедестал үрдүкү кэрдииһигэр тахсан турбуттара.
Гиирэ анньыытыгар 60 киилэҕэ Василий Дьячковскай (Дьокуускай) Манчаары спартакиадатын кыайыылааҕынан буолбута.
Мас тардыһыытыгар Виктор Николаев ыйааһыныгар чемпион аатын ылбыта, Дмитрий Шарин (Мэҥэ Хаҥалас) ыйааһыныгар уонна абсолютнайга эмиэ Х Манчаары бирииһигэр бастаабытын курдук, көрсүбүт спортсменнарын барыларын турута тардыталаан, чахчы кыахтааҕын көрдөрбүтэ, бастыан бастаабыта.
Атах оонньуутугар кылыыга Борис Ильин (Мэҥэ Хаҥалас) 45 м 08 см түһэн чемпион буолар, иккис түмүгү Василий Николаев (Эдьигээн) 43 м 20 см, үһүс миэстэни көрдөрөр Игорь Сокольников (Уус Алдан) 42 м 61 см. Ыстаҥаҕа Борис Ильин (Мэҥэ Хаҥалас) 42 м 65 см ыстанан бастаабыта, иккис түмүгү Василий Николаев (Эдьигээн) 41 м 35 см, үһүс Иннокентий Григорьев (Өлүөхүмэ) 40 м 76 см буолбута. Куобахха Владимир Рожков (Мэҥэ Хаҥалас) 36 м 95 см түһэн, Манчаары спартакиадатын куобахха чемпион аатын ылар, иккис көрдөрүүлээх Василий Николаев (Эдьигээн) 36 м 88 см, үһүскэ Герман Никифоров (Горнай) 36 м 68 см буолар. Үс көрүҥ түмүгүнэн I м Борис Ильин (Мэҥэ Хаҥалас) 122 м 65 см, II м Василий Николаев (Эдьигээн) 121 м 43 см, III м — Иннокентий Григорьев (Өлүөхүмэ) 118 м 31 см.
Хапсаҕай тустууга эр дьоҥҥо 55 киилэҕэ Рево Андросов (Уус Алдан) чемпионнуур, Сергей Слепцов (Кэбээйи) иккис, үһүс миэстэҕэ Роман Уйгуров (Алексеевскай). 60 киилэҕэ Степан Иннокентьев (Бүлүү) чемпион аатын ылбыта, иккис миэстэҕэ Анатолий Петров (Орджоникидзевскай), үһүскэ Иннокентий Баишев (Ленинскэй). 70 киилэҕэ Николай Черкашин (Уус Алдан) бастакы миэстэни ылар, иккискэ Андрей Александров (Дьокуускай), үһүскэ Максим Адарисов (Ленинскэй) тахсыбыттара. 80 киилэҕэ Кирилл Захаров (Чурапчы) тэҥнээҕэ суох буолбута, иккискэ Александр Кардашевскай (Үөһээ Бүлүү), үһүс Николай Баттахов (Ленинскэй) бочуоттаах миэстэҕэ тиксибитэ. 80 киилэ үөһэ Григорий Попов (Амма) бастакы миэстэҕэ тахсыбыта, чахчы кыахтааҕы көрдөрбүтэ, Константин Васильев (Үөһээ Бүлүү) иккис, үһүс Алексей Никитин (Нам) буолбута. XII—с Манчаары Баһылай спартакиадатын хапсаҕай тустуу абсолютнай чемпионунан Юрий Андреев (Ленинскэй)тахсыбыта. Хапсаҕайга хамаанданан Ленинскэй оройуон бастаабыта, II м – Уус Алдан, III м – Бүлүү буолбуттара. Уопсай хамаанданан түмүгүнэн Баһылай Манчаары бирииһигэр спартакиада улахан кубога кыайыылаах Дьокуускайга тиксэр, II м – Чурапчы оройуона, III м – Мэҥэ Хаҥалас. Хамаандалар туһааннаах кубоктарынан, дипломнарынан наҕараадаламмыттара.
Василий МОЖУКОВ, СӨ спордун бэтэрээнэ, Покровскай к.