Кыстыгы көрсө
Иһит нэһиэлэгэ кыстыгы, кыһалҕалаах соҕус да буоллар, көрсөргө туох кыалларынан тэристэр. Бу туһунан баһылык Михаил Максимов бу курдук кэпсээтэ:
— Хочуолунайдарбыт хапытаалынай өрөмүөн баран үлэлии тураллар, икки хочуол уларыйбыта. Быйыл онон үчүгэйдик кыстыахпыт диэн эрэл баар. Икки ыал киинтэн сылааска холбоммута, эһиилгигэ даҕаны былаан баар. Нэһилиэкпит биир өттүгэр саҥа хочуолунай тутуллуохтаах этэ даҕаны, кыаллыбата, ОДьХХ министиэристибэтиттэн эһиил тутуохпут диэбиттэрэ. Аны кулууппут хаарбах туруктаах, сиҥниэх курдук. Элбэх хайысхалаах киин дьиэтин туттарыахпытын баҕарабыт даҕаны, эмиэ уталыйда, сылааһы туттун диэн өрөмүөн ыыта сылдьабыт. Дьиҥинэн, манна тутуллубута буоллар кулуубу, бибилэтиэкэни, олохтоох дьаһалтабытын киллэриэхтээх этибит. Оччоҕо үп-харчы даҕаны тэрилтэлэрбитин тутан олорорго кэмчилэниэ этэ. Тутуллар сирин экспертизата, сылааһынан хааччыллыытын схемата оҥоһуллубута. Эмиэ «эһиил» диэн буолла. Тутталлар диэн эрэнэбит. Электро-эньиэргийэнэн хааччыллыыга үлэ барар. Энергетиктэр остуолбалары, КТП, уот ситимин уларыппыттара. Онон син этэҥҥэ кыстыахпыт диэн саныыбыт,- диэтэ Михаил Семенович.
Людмила Аммосова.